Rundunar ‘yan sandan jihar Legas ta cafke wani mutum mai suna Ifeanyi Ezenagu mai shekaru 34, bisa zarginsa da yi wa mata shida fashi da makami.
Jami’in hulda da jama’a na rundunar ‘yan sandan jihar, SP Benjamin Hundeyin, shi ne ya tabbatar da kamen a wata sanarwa da ya fitar ranar Asabar a Legas.
Ya ce wanda ake zargin ya yi wa mata shida fashin kaya masu daraja, jami’an tsaro na yankin Surulere ne suka kama shi.
“Wanda ake zargin ya yi wa matan fashin wayoyinsu kirar iPhone 12 guda uku, iPhone 11 Pro Max guda biyu, iPhone XR daya, wayar Nokia daya, agogon hannu daya da sarka na gwal daya, da kudinsu ya kai Naira miliyan 2 da dubu 368.
“Ya kama su zuwa wani otal, inda ya sanya musu kayan maye a ruwan sha, wanda hakan ya sa suka yi barci mai nauyi.
“Bincike ya nuna cewa ya yi wa mata sama da 30 fashi tun lokacin da ya shiga wannan aika-aika,” in ji Hundeyin.
Ya ce kayayyakin da aka sace duk an kwato su kafin nan aka kama shi.
