Karamin ministan gidaje da raya birane Yusuf Abdullahi Ata, ya bayyana cewa idan har jam’iyyar (APC) ta samu nasara a zaben 2027 a Kano, tilas ne jam’iyyar ta zabi sabbin shugabannin gaskiya da mutuntawa domin samun nutsuwar zuciyar al’umma.
Da yake magana a wani taron manema labarai a Kano a ranar Litinin, Ata ya jaddada cewa mayar da Abdullahi Abbas a matsayin shugaban jam’iyyar APC karo na 4 a Kano zai haifar da hasarar zabe ga jam’iyyar.
“Wannan shine ra’ayina, kuma ya kasance baya canzawa. Za mu yi adawa da maido da shugabancin jam’iyyar APC a Kano, kamar yadda muka ga illar hakan a zaben da ya gabata. Ba za mu bari a sake faruwar lamarin ba,” in ji shi.
Da yake magana kan ikirarin Abbas na cewa ministan ba dan jam’iyyar APC ba ne, Ata ya yi watsi da hakan a matsayin karya, inda ya bayyana cewa shi mamba ne kuma bai taba barin jam’iyyar ba.
Karin labari: Ba mu san yadda aka yi Tinubu ya nada Yusuf Ata minista ba” – Abdullahi Abbas
Ya kuma musanta cewa wani ya yi tasiri ko kuma ya dauki nauyin yin adawa da ayyukan Abbas.
“Abin takaici ne kuma marar tushe a ba da shawarar cewa ana daukar nauyina. Hanya mafi dacewa ita ce canza shugabancin jam’iyyar APC a jihar Kano,” in ji Ata. “Muna bukatar shugabanni masu gaskiya da mutuntawa domin mutanen Kano su karbi jam’iyyar APC. Wannan ita ce kawai mafita.”
