Gwamnan jihar Kano, Alhaji Abba Kabir Yusuf ya mika gaisuwar ban girma ga al’ummar Musulmin Kano da ma sauran sassan kasar nan na bukukuwan karamar Sallah, inda ya bukace su da su kiyaye kyawawan dabi’un hakuri, tausayi da hadin kai da ake da su a cikin watan Ramadan.
A wata sanarwa da mai magana da yawun gwamnan, Sunusi Bature Dawakin Tofa ya fitar a ranar Lahadin da ta gabata, gwamnan ya jaddada muhimmancin dorewar sadaukarwa da sadaukar da kai, tare da karfafa gwiwar ‘yan kasa su tallafa wa marasa galihu da inganta zaman lafiya a cikin al’ummarsu.
Gwamna Yusuf ya tabbatar wa al’ummar Kano kudirin gwamnatinsa na inganta rayuwa, tabbatar da ci gaban tattalin arziki, jin dadin jama’a, da ci gaban ababen more rayuwa.
Karin karatu: Barka da Sallah: Ka da mu manta da muhimman darusan da muka koya a cikin Ramadan – Garo
Ya kuma jaddada bukatar zaman lafiya a tsakanin kabilu da addinai a jihar, yana mai bayyana hadin kai a matsayin babban karfi na Kano.
Da yake jawabi game da kisan gillar da aka yi wa ’yan asalin Kano a Jihar Edo, gwamnan ya nuna matukar alhininsa kan lamarin.
Ya sha alwashin cewa gwamnatinsa ba za ta huta ba har sai an gano wadanda suka aikata wannan aika-aika tare da gurfanar da su gaban kuliya.
Ya bukaci ‘yan kasar da su yi amfani da lokacin bukukuwan don karfafa dankon iyali, inganta sulhu, da samar da zaman lafiya.
Ya kuma yi kira gare su da su yi koyi da kyawawan halaye na Annabi Muhammad (Sallallahu Alaihi Wasallam) ta hanyar tabbatar da adalci da gaskiya da tausayi a cikin dukkan mu’amala.
