Majalisar dattawa ta sanar da cewa za ta gudanar da zaman majalisa na gaggawa a ranar Talata, 10 ga watan Fabrairu 2026, sakamakon ƙara tattaunawa da muhawara a bainar jama’a kan sauye-sauyen da ta yi wa dokar zaɓe kwanan nan.
Hakan na cikin wata sanarwa da magatakardar majalisar dattawa, Emmanuel Odo, ya sanya wa hannu ranar Lahadi, inda aka tabbatar da shirin sake taron majalisar domin duba batun da ya janyo ce-ce-ku-ce a faɗin ƙasa.
Shugaban majalisar dattawa, Godswill Akpabio, ya umarci a sake kiran zaman majalisar domin wannan zama na gaggawa, wanda zai fara da misalin ƙarfe goma sha biyu na rana, tare da buƙatar dukkan sanatoci su halarta domin tattauna muhimman batutuwan da suka taso.
Zaman gaggawar ya zo ne ‘yan kwanaki kaɗan bayan majalisar dattawa ta amince da kudirin gyaran dokar zaɓe a ranar huɗu ga watan Fabrairu, amma ta ƙi amincewa da sashe na sittin sakin layi na uku, wanda ke neman wajabta tura sakamakon zaɓe ta hanyar lantarki kai tsaye yayin da ake tattara sakamakon.
Sashen da aka ƙi amincewa da shi zai tilasta wa jami’an zaɓe a rumfunan kaɗa ƙuri’a su tura sakamakon zaɓe ta hanyar lantarki kai tsaye zuwa tashar duba sakamakon zaɓe ta hukumar zaɓe mai zaman kanta ta ƙasa, amma maimakon haka majalisar ta bar tsohon tanadin da ke bai wa jami’ai damar tura sakamakon bisa zaɓinsu bayan an ƙirga ƙuri’u kuma an sanar da sakamakon a fili.
Wannan mataki ya janyo martani mai zafi daga ƙungiyoyin farar hula da jiga-jigan adawa, inda suka bayyana shi a matsayin koma baya ga bunƙasar Najeriya, suna masu nuna damuwa kan tasirin hakan ga gaskiya da amincin zaɓe a nan gaba.
Sai dai shugaban majalisar dattawa Godswill Akpabio ya kare matsayar majalisar, yana mai jaddada cewa ba a ƙi amfani da fasahar lantarki wajen tura sakamakon zaɓe ba.
Tare da bayyana cewa majalisar ba za ta amince da matsin lamba ko tsoratarwa ba, yayin da ake sa ran zaman gaggawar ranar Talata zai sake nazari kan gyaran dokar a tsakiyar matsin lamba daga jama’a da kuma yiwuwar ƙalubalantar shari’a daga wasu masu ruwa da tsaki, ciki har da lauyan kare haƙƙin ɗan Adam Femi Falana.
