Iyabo Obasanjo, ‘yar tsohon shugaban ƙasa Olusegun Obasanjo, ta tabbatar da cewa ta shiga jam’iyyar APC mai mulki, inda ta bayyana jam’iyyar a matsayin gidan siyasar da ya dace da ita.
Ta tabbatar da hakan ne a ranar Asabar yayin wata hira da tsohon fitaccen ɗan wasan ƙwallon ƙafa na Najeriya Segun Odegbami a tashar rediyon Eagle7 Sports mai lamba 103.7FM da ke Abeokuta, inda ta bayyana cewa ta dawo siyasa bayan kusan shekaru 15 da barinta.
Iyabo Obasanjo ta koma siyasa ne gabanin babban zaɓen shekarar 2027 a jihar Ogun, bayan ta yanke shawarar shiga APC domin ci gaba da harkokinta na siyasa a ƙarƙashin jam’iyya mai mulki.
Ta bayyana cewa dawowarta siyasa ta samo asali ne daga matsin lamba da goyon bayan da ta samu daga magoya bayanta, waɗanda suka daɗe suna ƙarfafa ta ta dawo domin neman wani muƙami na siyasa.
Iyabo Obasanjo ta tuna cewa ta taɓa zama kwamishiniyar lafiya a jihar Ogun, sannan ta wakilci yankin Ogun ta tsakiya a majalisar dattawa tsakanin shekarun 2007 zuwa 2011, kafin ta sha kaye a yunƙurinta na sake tsayawa takara a shekarar 2011 a hannun Gbenga Obadara na jam’iyyar ACN a wancan lokaci.
Bayan ficewarta daga siyasa, ta koma ƙasar Amurka inda ta mayar da hankali kan aikin ilimi, har ta kai matsayin farfesa, kafin daga bisani ta yanke shawarar dawowa siyasa bayan tattaunawa da masu ruwa da tsaki.
Ta bayyana cewa ba za ta iya komawa jam’iyyar PDP ba sakamakon rikice-rikicen cikin gida da jam’iyyar ke fuskanta, tare da bayyana cewa jam’iyyar ADC ma ta kasance zaɓi a gare ta, sai dai ta lura cewa jam’iyyar ba ta kai matakin shiryawa yadda ya kamata ba a halin yanzu.
Iyabo Obasanjo ta ƙara da cewa bayan yin shawarwari masu faɗi, ta fahimci cewa duk mutanen da suka ƙarfafa ta ta dawo siyasa suna cikin APC, lamarin da ya sa ta ji jam’iyyar ita ce mafi dacewa da ita, tare da tabbatar da cikakken jin daɗinta da kwarin gwiwa a matsayinta na sabuwar mamba a APC.
Rahotanni sun tabbatar da cewa Iyabo Obasanjo ta kammala rajistar APC a Ibogun, shiyya ta 11, a ƙaramar hukumar Ifo ta jihar Ogun, abin da ya tabbatar da cikakken shigarta jam’iyyar APC.
