Hukumar zaɓe ta ƙasa INEC ta gudanar da wani taro da shugabannin jam’iyyun siyasa a hedikwatarta da ke Abuja domin gabatarwa da kuma tattauna sabbin ƙa’idojin zaɓe gabanin babban zaɓen shekarar 2027.
Wadanda suka halarci taron sun haɗa da shugabanni da sakatarorin jam’iyyun siyasa da kuma wakilansu daga sassa daban-daban na ƙasar nan.
Daga cikin mahalarta akwai Sanata Nenadi Usman mai wakiltar jam’iyyar Labour Party, yayin da Abdulrahman Mohammed da Samuel Anyanwu suka wakilci jam’iyyar PDP.
Taron ya mayar da hankali ne kan gabatarwa da tattaunawa kan sabbin ƙa’idojin zaɓe da aka tsara domin jagorantar yadda za a gudanar da zaɓen 2027.
Wannan mataki ya biyo bayan amincewa da dokar zaɓe ta shekarar 2026, wanda ya sa ya zama dole a sake duba tsoffin tsare-tsare da ake amfani da su a baya.
Shugaban INEC ya bayyana cewa sabbin ƙa’idojin sun dace da tanade-tanaden sabuwar dokar zaɓe, yana mai cewa jam’iyyun siyasa da sauran masu ruwa da tsaki ba za su iya ci gaba da amfani da tsoffin ƙa’idoji ba a sabon tsarin zaɓe da ake ciki yanzu.
Baya ga wannan, hukumar ta bayyana wasu shirye-shiryen da take yi kafin zaɓen, ciki har da rajistar masu zaɓe ta dindindin CVR, wadda za a fara da rajista ta internet daga ranar 18 ga Agusta 2025, sannan a ci gaba da rajista a zahiri daga ranar 25 ga Agusta 2025.
Haka kuma, INEC ta sanar da shirin sake tantance rijistar masu zaɓe a faɗin ƙasa domin cire sunaye masu maimaituwa da kuma na mutanen da suka rasu, domin ƙara ingancin kundin masu zaɓe.
Ana ci gaba da muhawara kan gyaran dokokin zaɓe, musamman kan wasu tanade-tanade a cikin kudirin gyaran dokar zaɓe ta 2026, ciki har da matsayar majalisar dattawa kan aika sakamakon zaɓe kai tsaye ta hanyar lantarki zuwa shafin IReV na INEC.
A halin yanzu kuma harkokin siyasa na ƙara zafafa gabanin zaɓen, inda jam’iyyar APC ta amince da goyon bayan Shugaba Bola Tinubu domin zarcewa wa’adi na biyu, yayin da wasu ‘yan adawa da suka haɗa da Atiku Abubakar da Rotimi Amaechi da Peter Obi ke duba yiwuwar kafa haɗakar jam’iyya ta ADC domin kalubalantar jam’iyyar da ke mulki.
