Gwamnan jihar Kano, Abba Kabir Yusuf, bai halarci bikin Hawan Nasarawa na bana, yayin da kakakin majalisar dokokin jihar, Jibril Isma’il Falgore, ya karɓi sarkin Kano na 16, Muhammadu Sanusi II, a gidan gwamnati da ke Kano.
Jaridar Solacebase ta rawaito cewa wata sanarwa da mai ba gwamna shawara na musamman kan yaɗa labarai, Ibrahim Adam, ya fitar ta bayyana cewa gwamnan ya tafi birnin Lagos domin halartar taron ƙungiyar gwamnonin jam’iyyar APC.
Mutanen da suka halarci taron sun haɗa da sakataren gwamnatin jiha, kwamishinoni, shugabannin ƙananan hukumomi da sauran manyan jami’an gwamnati.
Hawan Nasarawa, wanda yake daga cikin manyan al’adun bikin Sallah a Kano, an gudanar da shi ne a wani tsari na musamman a wannan shekarar sakamakon takunkumin da gwamnatin jiha ta ɗora kan wasu daga cikin harkokin Hawan Sallah.
Gwamnatin ta amince da gudanar da Hawan Nasarawa kaɗai ne, inda ta bayyana dalilan tsaro a matsayin hujja, tare da umartar a yi shi cikin takaitaccen tsari.
A yayin da gwamnan bai halarta ba, kakakin majalisar dokokin jihar ya wakilci gwamnati tare da karɓar sarkin Kano da tawagarsa bisa al’adar da aka saba.
