Gwamnatin jihar Kano ta biya basukan albashin watanni takwas ga ma’aikatan shara 2,369, inda ta cika alkawarinta na inganta jin dadin ma’aikata.
An gudanar da bikin kaddamar da biyan kudin a hukumance a ranar Laraba a dakin taro na gidan gwamnati.
Da yake jawabi a wajen taron, gwamnan jihar Kano, Alhaji Abba Kabir Yusuf, wanda kwamishinan muhalli da sauyin yanayi, Dr. Dahir M. Hashim ya wakilta, ya bayyana cewa tun farko gwamnati ta biya albashin wata daya domin saukaka wa ma’aikata matsalolin kudi tare da yin aiki da tsarin biyan albashi mai dorewa.
Ya bukaci ma’aikatan da su ci gaba da jajircewa wajen gudanar da ayyukansu da kuma ci gaba da yi wa gwamnatin Gwamna Yusuf addu’a domin samun nasara musamman a wannan lokaci mai alfarma. Ya kuma jaddada muhimmiyar rawar da masu shara a kan titi ke takawa wajen tabbatar da tsafta da lafiya a Kano.
Karin karatu: Gwamnatin Kano ta yi haɗin gwiwa da kamfanin Aqua Power don sarrafa shara da samar da makamashi
Dakta Hashim ya yabawa gwamnan bisa goyon baya da jajircewarsa na ci gaban jihar musamman a fannin tsaftace muhalli da kuma jin dadin jama’a.
Ya bayyana irin kalubalen da gwamnati ta fuskanta a lokacin da ta hau karagar mulki, inda ya ce da yawa daga cikin masu shara a tituna ba a biya su albashi ba tsawon watanni shida.
“Lokacin da muka karbi ragamar aiki, mun gano cewa wadannan ma’aikatan ba su karbi albashin su kusan watanni shida ba. Bayan wata biyu, bashin ya taru zuwa wata takwas,”.
Kwamishinan ya bayyana cewa gwamnati ta tantance tare da bude asusun ajiyar banki na masu shara a titunan su 2,369, tare da katin ATM 2,006 da aka shirya.
Wata wadda ta ci gajiyar tallafin, Dayyaba Abubakar daga karamar hukumar Kumbotso, ta tabbatar da karbar albashin ta, sannan ta mika godiyar ta ga gwamnan jihar bisa wannan karamcin da ya yi mata.
Shi ma wani mai shara a titi Salisu Sani ya nuna jin dadinsa. “Ina matukar godiya ga gwamnatin jihar Kano da ta daidaita makudan albashin mu. Wannan ya sauke babban nauyi daga kafadunmu,” inji shi.
