Sarkin Kano na 16, Muhammadu Sanusi II, ya isa gidan gwamnatin jihar Kano domin gudanar da bikin Hawan Nasarawa kamar kowace shekara a cikin ayarin motoci, inda ya kauce daga hawan doki na gargajiya da aka saba.
SolaceBase ta ruwaito cewa, ‘yan sanda tare da sauran hukumomin tsaro a ranar Juma’a sun haramta ayyukan haye-hayen dawakau saboda dalilan tsaro.
Wannan matakin ya biyo bayan shingaye da jami’an tsaro suka kafa a hanyoyin jihar zuwa gidan gwamnati, yayin da ake gudanar da bikin Sallah na Sarki Aminu Ado Bayero karo na 15 a Gidan Sarki Nasarawa, mai tazarar kilomita kadan daga gidan gwamnati.
A al’adance, tawagar Sarkin Kano na hawan dawaki daga Kofar Kudu kan titin fadar sarki zuwa kofar Nasarawa, inda suka bi hanyar jihar zuwa gidan gwamnati. Sau da yawa Sarkin yakan tsaya a fadar Nasarawa kafin ya wuce.
Labari mai alaƙa: Da ɗumi-ɗumi: Rundunar ƴan sanda ta dakatar da hawan Sallah a Kano
Duk da sauye-sauyen da aka samu, jama’ar da ke cike da murna sun yi wa ayarin motocin Sarkin maraba yayin da suke kan hanyarsu ta zuwa gidan gwamnati.
Wani jadawalin fita da masarautar Kano ta fitar ya yi cikakken bayani kan hanyar da Sarki Sanusi II ya bi, daga Kofar Kudu ya wuce Sabuwar Kofa, BUK Road, Zariya Road, Gadar Lado, da shatale-talen Tarauni kafin ya isa gidan gwamnati.
Hanyar dawowa, kamar yadda Masarautar Kano ta bayyana, ya nuna cewa daga gidan gwamnati, Sarkin zai bi hanyar Lodge zuwa asibitin Nasarawa, sannan ya bi titin Banki, titin Ibrahim Taiwo, Fagge, Kofar Mata, Shahuci, daga karshe ya isa kofar Fatalwa a cikin fadar sarki.
Matakin dai ya samu martani daban-daban daga jama’a, inda wasu ke nuna damuwa kan yadda ake tabarbare al’adun gargajiya, yayin da wasu kuma suka yabawa Sarkin kan yadda ya ba da fifiko wajen tabbatar da tsaro a cikin yanayin.
