Wani shaidan ɓangaren masu ƙara a shari’ar Godwin Emefiele, tsohon gwamnan Babban bankin ƙasar Najeriya, ya shaida wa babbar kotun Babban birnin tarayya da ke Abuja cewa an fitar da Dala Miliyan 6.23 daga bankin ta hanyar amfani da takardun bogi.
Shaidan, wanda shi ne shaida na goma sha ɗaya kuma mataimakin darakta a Babban bankin ƙasa CBN mai suna Bashirudden Maishanu, ya bayar da shaidarsa a gaban alkalin shari’ar Hamza Muazu a ƙarar da Hukumar yaƙi da cin hanci da rashawa da laifukan kuɗi ta shigar kan Emefiele.
Maishanu ya bayyana cewa an fitar da kuɗaɗen ne daga reshen Garki na Babban bankin CBN a ranar 8 ga Fabrairu, 2023, bayan wani mutum mai suna Alhaji Ahmed ya tuntube shi a watan Janairu na shekarar, yana ikirarin yana aiki da wata kwamitin musamman a ofishin Sakataren Gwamnatin Tarayya.
A cewarsa, Ahmed ya bayyana cewa Eric Ocheme, wanda aka bayyana a matsayin mataimakin Emefiele a lokacin yana gwamnan bankin ne ya umurce shi da su gana dangane da wasu mu’amaloli da ake sarrafawa a bankin, inda daga bisani Ahmed ya ce an samu amincewar fadar shugaban ƙasa, kuma abin da ya rage shi ne amincewar Emefiele.
Shaidar ya ƙara da cewa an buƙaci a biya kuɗaɗen a tsabar kuɗi, tare da roƙon sa ya raka kuɗin ko ya ba da shawarar wani da zai yi hakan, inda a ranar fitar da kuɗin Ahmed ya tafi da Dala Miliyan 2.5, yayin da aka bar wasu Dala Miliyan 2.5 a hannunsa tare da wasu biyu.
Ya kuma shaida wa kotu cewa kuɗaɗen da aka fitar an ce za a yi amfani da su ne wajen kashe-kashen da suka shafi zaɓe, ciki har da biyan kuɗin masu sa ido kan zaɓe, yana mai cewa abin ya ba shi mamaki domin ba a taɓa tattauna irin wannan biyan ba.
Maishanu ya bayyana cewa ladabtarwa ga ma’aikatan banki da suka yi laifi na iya kaiwa daga gargadi zuwa sallama, gwargwadon nauyin laifin, amma ya ce bai fuskanci wani hukunci daga hukumar gudanarwar bankin ba, duk da cewa daga baya ya fahimci cewa takardun da aka yi amfani da su bogi ne, yana ɗaukar alhakin rawar da ya taka.
Alkalin ya ɗage shari’ar zuwa ranar 30 ga Janairu, 2026, domin ci gaba da sauraron ƙarar.
