Hukumar kula da makarantu na fasaha ta ƙasa (NBTE) ta bayyana aniyarta na ci gaba da fatattakar makarantu marasa inganci da ke kwaikwayon kwalejojin fasaha a Najeriya.
Wannan mataki, a cewar hukumar, yana da nufin tabbatar da ingantacciyar ilimi da kare amanar gwamnati wajen samar da ilimi na zamani.
A ziyarar tantancewa zuwa kwalejin ilimin kimiyya,kasuwanci da harkokin mulki ta Harvarde a Abeokuta, Jihar Ogun, daraktar shirye-shiryen kwalejojin fasaha a NBTE, Dakta Fatimah Kabir Umar, ta ce hukumar ba za ta yi sassauci ga duk wani gagarumin ƙarya da ake kira makarantar fasaha ba.
Ta ce ana ci gaba da wannan yaki ne domin tabbatar da tsabta a fagen ilimi da kuma kare muradun ƙasa.
NBTE ta kuma sanar da haɗin gwiwa da cibiyar bincike da horo ta MOC-LLC da ke Amurka, domin ƙaddamar da shirin Binciken Injiniya da Fasaha na Zamani mai Haɗa Fannonin Ilimi a Najeriya.
Wannan tsari, a cewar sakataren hukumar, Farfesa Idris Bugaje, zai kawo sabon salo wajen sauya kwalejojin fasaha zuwa cibiyoyin ƙirƙira, bincike da samar da ayyukan yi.
Farfesa Bugaje ya bayyana cewa shirin ya riga ya bai wa malamai horo a fannin fasahar zamani, ciki har da na’urar basirar wucin gadi (AI), koyon na’ura (machine learning), da kuma amfani da dabarun bincike na zamani.
Ya ce an shirya taron kasa da kasa a Abuja a watan Nuwamba domin gabatar da sakamakon wannan cigaba ga jama’a.
Haka kuma, shugaban sashen haɗin gwiwa da bincike na NBTE, Dakta Zakari Abdullahi, ya bayyana shirin a matsayin “mai sauya tarihi” wajen bai wa malamai damar haɗa bincike da koyarwa. Ya ce wannan zai haifar da sababbin hanyoyin ƙirƙira da amfanin al’umma.
Daga cikinsu, an ce wakilan makarantu sun kai ziyara hedkwatar MOC-LLC a Atlanta, Amurka, inda aka tattauna kan yadda za a ƙarfafa tsarin karatu, sabunta jadawalin karatu da kuma tallafawa bincike.
An kuma sanar da cewa taron kasa da kasa da NBTE za ta shirya daga 25 zuwa 27 ga Nuwamba a Abuja zai haɗa sama da ƙungiyoyin bincike 46 da za su nuna cigaban da aka samu.
Wakilan MOC-LLC sun bayyana wannan haɗin gwiwa da NBTE a matsayin abin koyi ga Afirka, tare da tabbatar da cewa malamai a Najeriya za su zama gaba wajen jagorantar bincike da ƙirƙira a fannin injiniya da fasaha.
