Ya zuwa yanzu dai an gano gawarwaki 143 tare da binne su sakamakon munanan hare-hare da aka kai a ranakun Laraba da Alhamis a wasu kauyukan kananan hukumomin Anka da Bukuyyum na jihar Zamfara.
Idan dai za a iya tunawa, ‘yan ta’addan masu biyayya ga shugabansu Bello Turji sun yi hijira zuwa zuwa wasu sassa daban-daban biyo bayan barin wuta da jiragen yakin rundunar sojojin saman ta yi musu a matsugunin su dake dajin Fakai da ke karamar hukumar Shinkafi, inda suka yi tattaki zuwa kudancin Zamfara.
Mazauna garin sun shaida wa Aminiya a ranar Juma’a cewa ana ci gaba da zakulo wasu gawarwaki daga cikin dazuzzuka yayin da wasu daga cikin mutanen suka shiga gonakinsu ba tare da saninsu ba.
Wakilinmu ya ruwaito cewa gawarwakin wasu daga cikin wadanda abin ya shafa sun yanke kawunansu ko kuma sun kone su ba a iya gane su.
Wani mazaunin garin mai suna Babangida ya ce, “Wani labari mai ban tausayi game da kisan gilla shi ne yadda mata da kananan yara ba su tsira ba. Yayin da gobarar ta tashi a gidajen mutane, yara da mata ba a bar su su tsere ba, saboda ‘yan ta’addan sun tsaya a waje suna jiran kowa ya fito.
Wani soja mai ritaya ya shaida wa Daily Trust cewa maharan sun kashe sama da mutane 250.
“Kimanin shanu da sauran dabbobin gida 2,000 ne aka sace yayin da aka kona gidaje da dama da shagunan abinci. Ko da lamarin ya daidaita, za a bar mazauna wurin ba su da abincin da za su ci,” wata majiya ta ce.
Daily Trust ta ruwaito a ranar Juma’a cewa an kai hare-hare a wasu kauyuka biyar na Kurfa Danya, Kurfa Magaji Rafin Gero, Tungar Isa da Barayar Zaki a kananan hukumomin Bukkuyum da Anka.
‘Yan ta’addan sun dauki tsawon sa’o’i 48 suna kashe mutanen yankin tare da kona gidajensu da gonakinsu.
Wani jirgin yaki da aka aike zuwa yankin a aikin ceto bai iya cimma wani abu mai yawa ba domin bayan da suka fahimci hatsarin, ‘yan ta’addan sun narke cikin fararen hula.
Wata majiyar kuma ta ce ‘yan ta’addar sun yi amfani da mutanen ne a matsayin garkuwar mutane, lamarin da ya sa jirgin yakin ke da wuya ya yi musu bam.
“Da dare ne suka bace saboda a zahiri ba zai yiwu jirgin yakin ya kai musu hari ba,” in ji shi.
Gwamnatin jihar da jami’an tsaro ba su fito a hukumance ba game da hare-haren har zuwa lokacin da za a buga rahoto.
Majiya mai tushe ta bayyana cewa an hangi ‘yan ta’addar dauke da makamai suna kafa tantuna a dajin Gando da ke karamar hukumar Bukkuyum a kudancin jihar.
