Gwamnatin jihar Kano ta nemi a kama tsohon gwamnan jihar kuma tsohon shugaban jam’iyyar APC na ƙasa, Dr. Abdullahi Umar Ganduje, bisa zargin ƙoƙarin ƙirƙirar wata haramtacciyar runduna ta sa-kai a jihar.
Kiran ya fito ne daga kwamishinan yaɗa labarai na jihar, Comrade Ibrahim Abdullahi Waiya, bayan zaman majalisar zartarwa da aka gudanar a ranar Alhamis.
Waiya yace, ‘yan bindiga sun shiga wata unguwa a Kano tare da sace mutane cikin kasa da awa 48 bayan sanar da yunkurin Ganduje na kafa wata runduna da ba bisa doka ba.
Kwamishinan ya yi gargadi ga jami’an gwamnati, ciki har da Sanata Barau Jibrin, da su guji yin furuci da ka iya tayar da tarzoma ko rikita zaman lafiya a jihar.
Waiya ya bayyana cewa gwamnatin Kano za ta ci gaba da kare zaman lafiya da tsaro, kuma duk wani yunƙurin tada hargitsi za a dakile shi cikin bin doka.
Ya yabawa shugaban ƙasa Bola Tinubu da hukumomin tsaro bisa ci gaba da goyon baya wajen kare rayuka da dukiyoyi a jihar Kano.
