Shugabannin hukumar tsaron farin kaya DSS daga jihohin Arewa maso Yamma tare da takwarorinsu daga yankin babban birnin tarayya, Neja da Filato sun gudanar da taro a Kaduna domin nazarin halin tsaro da kuma ƙarfafa dabarun yaƙi da ta’addanci a yankin.
Taron ya gudana ne a hedikwatar hukumar tsaron farin kaya ta jihar Kaduna, inda aka mai da hankali kan yadda za a inganta musayar bayanan sirri, haɓaka haɗin kai tsakanin hukumomi, da kuma inganta hanyoyin magance matsalolin ta’addanci da ta’addar ‘yan fashi ta hanyar dabaru masu amfani da ƙarfi da kuma marasa amfani da ƙarfi.
Gwamnan jihar Kaduna Sanata Uba Sani wanda kwamishinan tsaro da harkokin cikin gida, Sule Shuaibu, ya wakilta, ya bayyana cewa haɗin gwiwar hukumomin tsaro mai dogaro da bayanan sirri ce hanya mafi dacewa wajen shawo kan matsalar tsaro a Arewa maso Yamma da sauran sassan ƙasa.
Ya bayyana hukumar tsaron farin kaya a matsayin muhimmiya wajen tabbatar da kwanciyar hankali a ƙasar nan, yana mai yabawa da rawar da hukumar ke takawa wajen inganta tsaron ƙasa, goyon bayan dimokuraɗiyya, da kuma hana ƙungiyoyin tashin hankali yin tasiri.
Gwamnan ya jaddada cewa gudanar da taron na baiwa shugabannin tsaro damar yin tunani da daidaitawa da kuma ƙirƙirar sabbin tsare-tsare, yana mai cewa zamani na yau na buƙatar ingantaccen bincike, amfani da fasaha wajen tattara bayanai, da kuma amincewa tsakanin hukumomin tsaro.
Sarkin Zazzau, Ambasada Ahmad Nuhu Bamalli, ya yaba da hukumar tsaron farin kaya bisa haɗin gwiwar da take yi da masarautu, yana mai cewa tsarin sulhu ta hanyar gargajiya ya taimaka wajen rage yawaitar shari’u a fadar masarautar.
Ya kuma bayyana cewa tsarin binciken shugabannin yankuna da ƙauyuka na taimakawa wajen tabbatar da gaskiya tun daga tushe.
Daraktan hukumar tsaron farin kaya na jihar Kaduna, Hakeem Abiola, ya bayyana cewa taron na nufin ƙarfafa haɗin kai da magance gibin aiki, musamman wajen yaƙi da laifukan da ke wuce iyakokin jihohi.
Ya ce ƙarƙashin jagorancin babban darakta Oluwatosin Adeola Ajayi, hukumar ta gudanar da ayyuka na ƙarfi da na zaman lafiya, ciki har da shirin zaman lafiya na Kaduna wanda ya taimaka wajen rage hare-hare a manyan hanyoyin Kaduna–Abuja, Kaduna–Kachia da Birnin Gwari.
Ya kuma yi kira da a samar da dandalin tsaro na yankin Arewa maso Yamma wanda zai haɗa shugabannin tsaro, sarakunan gargajiya da shugabannin siyasa domin tabbatar da haɗin kai wajen magance barazanar tsaro mai tasowa.
