Gwamnatin jihar Kano ta musanta rahoton cibiyar binciken aikin jarida ta Wole Soyinka (WSCIJ) wanda ya sanya jihar cikin jerin jihohin da suka fi daƙile ’yancin faɗar albarkacin baki a Najeriya.
A taron manema labarai da aka gudanar a Kano, kwamishinan yaɗa labarai na jihar, Ibrahim Abdullahi Waiya, ya bayyana rahoton mai taken Shrinking Freedoms 2024 a matsayin mara tushe kuma wanda bai nuna ainihin gaskiyar halin da ake ciki a jihar ba.
Ya ce wannan rahoto kawai tunanin wasu marasa bincike ne da ke marawa ’yan jarida baya, yana mai jaddada cewa gwamnatin Abba Kabir Yusuf tana da cikakken goyon baya ga aikin jarida, gaskiya da kuma halartar jama’a a harkokin gwamnati.
Waiya ya ƙara da cewa gwamnati tana shirye-shiryen kafa dokar ’yancin samun bayani (Freedom of Information Act) a jihar domin ƙara tabbatar da gaskiya da samun bayanai ga jama’a.
Ya kuma shawarci cibiyar Wole Soyinka da kungiyoyi makamanta da su yi nazari a filin kafin fitar da rahotanni, yana gargadin cewa irin waɗannan bayanai na ƙarya na iya gurbata ƙoƙarin tabbatar da ’yancin faɗar albarkacin baki.
A baya jaridar Solacebase ta rawaito cewa rahoton Shrinking Freedoms 2024 na cibiyar Wole Soyinka ya haɗa Kano, Legas da babban birnin tarayya Abuja cikin jerin wuraren da aka fi samun tauye ’yancin ’yan jarida da masu fafutuka a shekarar 2024.
Rahoton ya nuna cewa an tattara misalai da dama na tsarewa ko cin zarafin ’yan jarida da masu fafutuka, ciki har da wasu daga Kano, inda wasu daga cikin waɗannan lamurra suka bayar da tambayoyi kan yadda gwamnati ke jure ra’ayoyi masu suka.
