Tsohon Shugaban Hukumar Kiyaye Haɗurra ta Ƙasa (FRSC), Dauda Ali Biu, ya rasu yana da shekaru 62 a duniya.
An haifi Biu a shekarar 1964 a Sabon Garin Zariya a Jihar Kaduna. Rahotanni sun ce ya rasu ne a yammacin ranar Lahadi a wani asibiti da ke Abuja, kamar yadda majiyoyi daga iyalansa suka bayyana.
Read also: Buhari ya nemi Majalisar Dattawa Ta Tabbatar da Kwamishinonin NMDPRA
Adamu Isa Gunda, wani ɗan’uwan mamacin, ya tabbatar da rasuwar, inda ya ce za a dawo da gawarsa daga Abuja zuwa Chikaji, Sabon Gari, Zariya, domin gudanar da jana’izasa bisa koyarwar addinin Musulunci.
Gunda ya ƙara da cewa mamacin, wanda yake riƙe da sarautar gargajiya ta Jagaban Sabon Gari, ya rasu ya bar mata ɗaya da ‘ya’ya biyar.
Kamfanin dillancin labarai na ƙasa (NAN) ya ruwaito cewa Biu ya shugabanci hukumar FRSC daga watan Yulin shekarar 2022 zuwa shekarar 2024, bayan shafe shekaru yana aiki a hukumar.
Read also: Gwamnatin tarayya ta ayyana ranar 3 ga watan Oktoba a matsayin ranar hutu.
Tsohon Shugaban Ƙasa Muhammadu Buhari ne ya naɗa shi muƙaddashin Shugaban FRSC a watan Yulin shekarar 2022, bayan wanda ya gabace shi, Boboye Oyeyemi, ya yi ritaya bayan kammala wa’adinsa.
Kafin naɗinsa, Biu ya riƙe muƙamin Mataimakin Shugaban Hukumar mai kula da harkokin kuɗi da asusun ajiya a hedikwatar FRSC da ke Abuja, inda yake kula da gudanar da harkokin kuɗaɗen hukumar.
Ya shiga hukumar a shekarar 1988, inda ya riƙa hawa muƙamai daban-daban. A shekarar 2014, ya zama Mataimakin Kwamishinan Hukumar mai kula da harkokin kuɗi da asusun ajiya, kafin daga bisani ya zama Mataimakin Shugaban Hukumar a shekarar 2016.
Biu ya samu digirin digirgir na biyu a fannin Gudanar da Kasuwanci (MBA) daga Jami’ar Ahmadu Bello da ke Zariya. Haka kuma, ya kasance ƙwararre kuma mabiyin Cibiyar Ƙwararrun Akantoci ta Ƙasa (FCNA).
Read also: Brazil ta haramta sayar da wayoyin iPhone marasa caja
(NAN)
