Kotun jiha da ke Fatakwal ta yanke wa Damian Okoligwe, ɗalibi da ke matakin shekara ta huduba jami’ar Port Harcourt, hukuncin kisa ta hanyar rataya bayan ta same shi da laifin kashe budurwarsa, Justina Otuene.
Alkalin kotun, Justice Chinwe Nsirim-Nwosu, ya tabbatar da cewa an tabbatar da dukkan hujjojin da ake buƙata a shari’ar kisa, lamarin da ya tabbatar da cewa Okoligwe ya aikata laifin da gangan.
Ɗalibi Okoligwe, da ke karatu a sashen injiniyan sinadarai na jami’ar, ya kashe Otuene, wadda ke karatu a mataki na uku a fannin ilimin sinadarai, a ranar 20 ga Oktoba 2023 a gidansa da ke unguwar Mgbuoba a Obio-Akpor.
Bayan kisan, ya dauki gawarta a wilbaro tare da kokarin zubar da shi kafin jami’an tsaro su kama shi.
A hukuncin da alkalin ya karanta, ta bayyana cewa halayen wanda ake tuhuma sun nuna rashin tausayi da mugunta, yana mai cewa babu wani sabani a cikin shaidun da aka gabatar da ke nuna cewa shi ne ya aikata laifin.
Kotun ta umarci a rataye shi har sai ya mutu.
Da yake karin haske bayan fitowa daga kotu, mai gabatar da kara, Charles Mbaba, ya bayyana jin daɗinsa da hukuncin, yana mai cewa hakan zai bai wa yan uwan mamaciyar nutsuwa, tare da zama izina ga matasa.
Ya ce Justina ita ce kaɗai ’ya a wajen iyayenta, kuma mutuwarta ta zo ne cikin yanayi marar tausayi da ke nuna rashin imani.
Dangane da hukuncin, babban ɗan’uwan mamaciyar, Osatawaji Otuene, ya nuna farin ciki da jin cewa hukuncin ya ba su sassauci.
Ya ce hukuncin ya tabbatar da cewa ƙanwarsa ba ta mutu a banza ba, kuma hakan ya zama ramuwa ga iyalinsu.
Lauyan wanda ake tuhuma ya ƙi bayyana komai kan shari’ar.
