Daga: Uzairu Adam
Gwamna Abba Kabir Yusuf a ranar Litinin ya kaddamar da jigilar maniyyata aikin hajjin bana a jihar Kano.
Jaridar SolaceBase ta rawaito cewa jirgin ya tashi da karfe 11:41 na safe, tare da jimillar maniyyata 578 a cikin jirgin Max Air B747 da ma’aikatansa 20, wanda ya nufi filin jirgin sama na Sarki Abdul-Aziz da ke Jeddah.
Gwamna Yusuf ya bukaci maniyyatan da su kasance jakadu nagari na jihar da Najeriya a kasa mai tsarki tare da yi wa jihar da kasa baki daya addu’a.
Karin labari: Gwamnan Kano Yusuf Ya Ba Da Umarnin Chafke Tsohon Sarkin Kano, Aminu Ado Bayero
A nasa bangaren, Darakta Janar na Hukumar Jin Dadin Alhazai ta Jihar Kano, Alhaji Lamin Rabi’u Danbappa ya ce mahajjatan da ke shirin a jirgin sun fito ne daga kananan hukumomi hudu na jihar.
A cewarsa, karamar hukumar Gwale tana da mahajjata 175 (maza 92 da mata 83), karamar hukumar Dala tana da alhazai 119 (maza 62 da mata 57), karamar hukumar Ungogo tana da alhazai 106 (maza 67 mata 39), sai karamar hukumar Fagge da ke da mahajjata 135 (maza 68 da mata 67.
Karin labari: Shugaba Tinubu ya ba da umarnin sake duba manyan makarantu bayan cece-kuce
Har ila yau, akwai jami’an gwamnati 9 da ke kula da ayyukan alhazai.
Ya kuma nuna jindadinsa ga Gwamna kan jin dadin Alhazai da suka hada da tallafin kudin Hajji na Naira 500,000 kowanne, da karin kudin tafiye-tafiyen da ya kai sama da Naira miliyan 367, da karin Riyal 100 na Saudiyya da aka bai wa dukkan maniyyatan.
