Yanzu-yanzu: Ƴan sanda sun saki tsohon shugaban hukumar karɓar ƙorafi da yaƙi da cin hanci da rashawa Muhuyi Magaji Rimin Gado bayan kama shi kan korafe-korafe daga Ganduje da wani mutum

Ƴan sandan Najeriya sun saki tsohon shugaban hukumar karɓar ƙorafi da yaƙi da cin hanci ta jihar Kano, Barrister Muhuyi Magaji Rimingado.

Jaridar Solacebase ta rawaito cewa, an kama Muhuyi ne a ofishinsa da ke kan titin Zariya a ranar Juma’a ta hannun runduna ta musamman ta Sufeto Janar na ’yan sanda, inda aka tafi da shi Abuja domin ci gaba da bincike.

Bayan fitowarsa, Muhuyi ya bayyanawa Solacebase cewa, zai sake komawa ranar Litinin domin kammala sharuɗɗan belinsa, bayan jiharsa ta kare kanta kan zarge-zargen da aka gabatar a kansa.

Ya tabbatar da cewa an shaida masa cewa tsohon gwamnan jihar Kano, Dakta Abdullahi Umar Ganduje, da tsohon babban daraktan kamfanin Noma na jihar Kano, Bala Inuwa, sun rubuta ƙorafe-ƙorafe biyu a kansa, wadanda suka danganci wasu lamurra da ake ci gaba da shari’a a kai.

Karanta: Gwamnatin Kano ta yi Allah wadai da kama tsohon shugaban hukumar karɓar ƙorafi da yaƙi da cin hanci Muhuyi Magaji Rimin Gado da ’yan sanda suka yi

Ƙorafin da ya fito daga Ganduje ya danganta Muhuyi da ƙoƙarin gurfanar da gwamnatin jihar kan zarginsa da mallakar kaso a tashar Tsandauri ta Dala, wadda ake zargin an karkatar da ita zuwa hannun Ganduje da ’ya’yansa.

A nasa ɓangaren, Bala Inuwa ya zargi Muhuyi da cewa an sayar da kadarorin da aka karɓa daga gare shi ta hanyar hukuma, zargin da ake ci gaba da sauraren shari’arsa a kotu, tare da shari’ar mallakar kaso na tashar Tsandauri ta Dala.

Dukkan shari’o’in da abin ya shafa na ci gaba da gudana a gaban kotu mai ikon sauraron su, kuma ana sa ran ƙarin bayani nan gaba.