Kimanin sojoji 10 ne wasu ‘yan ta’adda suka kai wa hari a wani sansanin soji da ke karamar hukumar Birnin-Gwari dake jihar Kaduna, inda suka kashe wasu da dama tare da jikkata wasu.
Lamarin ya faru ne da misalin karfe 6:30 na yammacin ranar Litinin, kamar yadda majiyoyin tsaro suka shaidawa gidan talabijin na Channels.
Sai dai har yanzu hukumomin sojin kasar ba su tabbatar da harin ba.
Birnin-Gwari dai na daya daga cikin wuraren da ‘yan ta’addan jihar Kaduna suka addaba, inda aka kashe mutane da dama, aka yi garkuwa da dubban mutane, da kuma durkusar da harkokin tattalin arziki a cikin shekaru biyar da suka gabata.
Wata majiyar tsaro a yankin ta shaida wa gidan Talabijin na Channels a ranar Talata cewa, an kai wa sojojin hari ne a wani sansanin sojoji na Forward Operational Base da ke kusa da unguwar Polwire kusa da gonar Mikati da ke kan hanyar Kaduna zuwa Birnin Gwari.
Ya bayyana cewa, ‘yan ta’addan ne suka yi awon gaba da sojojin da ba’a kai tantance adadinsu ba, inda suka mamaye sansanin da yawa a kan babura dauke da manyan makamai, inda nan take suka bude wa sojojin wuta.
Majiyar ta ci gaba da cewa, ‘yan bindigar sun sanya ido kan motsin sojojin, inda wasunsu suka fita zuwa hedikwatar rundunar ‘Forward Operational Base’ da ke cikin garin na Birnin-Gwari, nan take suka kaddamar da farmaki kan ‘yan tsirarun sojojin da ke a tsawo na FOB.
Harin na ranar Litinin ya biyo bayan sace mutane 11 da wasu ‘yan bindiga suka kai a kauyen Angwar Maji da ke garin Jere a karamar hukumar Kagarko ta jihar.
An kai harin ne a daren Lahadi a unguwar da ke kusa da babbar hanyar Abuja zuwa Kaduna da hanyar Kaduna zuwa Bwari.
Mazauna yankin sun ce ‘yan ta’addan sun kai harin ne kwana guda bayan da Sufeto Janar na ‘yan sandan Najeriya Usman Alkali ya sanar da tura karin dakaru zuwa babbar hanyar Abuja zuwa Kaduna da kewaye.
