Gwamna Yahaya Bello na Kogi a ranar Alhamis a Lokoja ya karbi bakuncin babban Khalifa na Jamiyyatu Ansarideen (Attijaniya) na duniya Sheikh Ibrahim Niasse, a yayin da jihar ke karbar bakuncin Maulidin Duniya karo na hudu a Najeriya.
Kamfanin Dillancin Labarai na Najeriya (NAN) ya ruwaito cewa taron, mai taken “Magance matsalolin al’umma ta hanyar koyarwar Annabci”, zai gudana a Lokoja daga ranar 6 ga Janairu zuwa 8 ga Janairu.
A cikin tawagar akwai tsohon Sarkin Kano, Khalifa Muhammadu Sanusi II, wanda shi ne shugaban kungiyar Jamiyyatu Ansarideen (Attijaniya) ta duniya, da sauran malaman addinin Islama.
Jamiyyatu Ansariddeen (Attijaniyya) karkashin jagorancin Sheikh Niasse ce ta shirya taron Maulidi wanda aka yi don girmama Manzon Allah (SAW).
Haka kuma ana sa ran halartar malaman addinin Musulunci daga sassa daban-daban na kasashen duniya tare da gabatar da laccoci da dama da suka shafi koyarwar Manzon Allah (SAW) kamar yadda ya shafi wannan zamani.
Taron dai zai hada da ziyartan majinyata da yi wa majinyata addu’a a asibitoci daban-daban na jihar, liyafar cin abinci ta musamman don girmama Manzon Allah (SAW).
Haka kuma za a yi Zikrul – Juma’at, wacce aka fi sani da ibadar yabo ta Juma’a, wadda za a yi a Babban Masallacin Lokoja.
