Gwamnatin tarayya ta sake fitar da ƙarin kuɗi har naira biliyan 32.9 ta hanyar Asusun samar da kiwon Lafiya a matakin farko (BHCPF), domin ci gaba da aiwatar da shirin gyaran BHCPF 2.0.
Sakataren kwamitin kula da ma’aikatar lafiya, Dakta Oritseweyimi Ogbe, ne ya sanar da hakan yayin taron kwamitin karo na 12 da aka gudanar a birnin Abuja.
Ogbe ya bayyana cewa wannan shi ne karo na uku da gwamnati ta fitar da kuɗi a shekarar 2025, kuma manufar ita ce ƙarfafa cibiyoyin kiwon lafiya na matakin farko (PHCs) a faɗin ƙasar da kuma tabbatar da ingantaccen amfani da kuɗaɗen a cikin al’umma.
Ya ce Hukumar Inshorar Lafiya ta Ƙasa (NHIA) tana duba jerin sunayen masu cin gajiyar inshora, yayin da Hukumar Ci gaban Kiwon Lafiya ta Farko (NPHCDA) ke faɗaɗa shirin biyan kai tsaye ga cibiyoyi.
A cewar Ogbe, tsakanin watanni na farko da na biyu na 2025, an samu ƙaruwa da fiye da mutum miliyan 1.4 da suka je jinya a cibiyoyin da ke cin gajiyar shirin, wanda hakan ya nuna ƙaruwa da kashi 28 cikin ɗari a samun damar kiwon lafiya.
Haka kuma, an samu ƙaruwa da kashi 18 cikin ɗari a jagorantar da ƙwararrun ma’aikatan lafiya suka jagoranta a lokacin.
Ya ce tabbatar da sabon jagorar shirin BHCPF 2.0 da ministan lafiya ya yi, babban mataki ne da zai taimaka wajen tabbatar da gaskiya, dorewa da kuma bin diddigin yadda kuɗaɗen ke gudana.
An bayyana cewa an kammala shirye-shiryen horar da kwamitocin jihohi kan yadda za su sa ido a kan amfani da kuɗaɗen, tare da haɗin gwiwar wasu abokan aiki kamar gidauniyar Bill & Melinda Gates, R4D, CHAI da shirin Lafiya Project.
Ogbe ya ƙara da cewa an ƙirƙiri tsarin kulawa da gaskiya mai matakai biyu na farko daga ɓangaren hukumomi da na biyu daga ƙungiyoyin fararen hula (CSOs) domin tabbatar da gaskiya da ingantaccen yanke shawara.
Haka kuma, Ma’aikatar Lafiya ta ƙarfafa haɗin gwiwa da Hukumar Yaƙi da Cin Hanci da Rashawa (ICPC) domin tabbatar da cewa ana amfani da kuɗin shirin yadda ya kamata, tare da hana almundahana a dukkan matakai.
An kafa asusun BHCPF bisa sashe na 11 na Dokar Lafiya ta Ƙasa ta 2014, kuma yana ɗaya daga cikin manyan hanyoyin samun kuɗi don kula da lafiyar jama’a da rage kuɗin da ‘yan ƙasa ke kashewa wajen neman magani.
Kamfanin dillancin labarai na ƙasa NAN ya ruwaito cewa taron ya tabbatar da aniyar gwamnati wajen tabbatar da gaskiya, sa ido da kuma ingantaccen aiwatar da shirin don tabbatar da cewa kuɗaɗen suna isa cibiyoyi kuma suna amfanar ‘yan ƙasa yadda ya kamata.
