Cibiyar Yaki da Ta’addanci ta kasa (NCTC), a karkashin ofishin mai baiwa shugaban kasa shawara kan harkokin tsaro (ONSA), za ta fara aiwatar da wani shiri na tsattsauran ra’ayi da kuma gyara a jihohin Arewa maso Yamma.
Ambasada Mairo Abbas-Musa, daraktar cibiyar yaki da ta’addanci NCTC ce ta bayyana hakan a taron tattauna manufofi da ilmantarwa na matasa da aka gudanar ranar Alhamis a Sakkwato.
Taron ya mayar da hankali ne kan batun albarkatun kasa da hanyoyin magance tashe-tashen hankula da aikata laifuka.
Kamfanin Dillancin Labarai na Najeriya NAN ya ruwaito cewa taron na kwanaki biyu ya gudana ne karkashin wata kungiya mai zaman kanta “International Alert” wacce kuma ke samun goyon bayan kungiyar ci gaban duniya da ƙarfafa zaman Lafiya da Juriya ta Burtaniya a nan Najeriya (SPriN).
Karanta: Zargin tallafawa Boko Haram: Majalisar Dattawa ta gayyaci NSA, NIA, da wasu hukumomin tsaro 2
Abbas-Musa ya bayyana cewa, gwamnatin tarayya na aiwatar da wasu tsare-tsare na yaki da ta’addanci (PCVE), inda hukumar ta NCTC ta himmatu sosai wajen samar da hadin gwiwar bayar da shawarwari domin dorewar sarrafa albarkatun kasa da hanyoyin fita daga tashin hankali.
Ta yi nuni da cewa, cibiyar tana taka muhimmiyar rawa wajen inganta hadin kai da kuma sa ido kan aiwatar da wasu bukatu, shirye-shirye, da tsare-tsare masu alaka da tsaro.
A cikin jawabinsa, Dakta Paul Nyulaku-Bemshima, Daraktan faɗakarwa na kasa da kasa, ya ce taron ya mayar da hankali kan hanyoyin fita daga tashin hankali da aikata laifuka, kuma zai ba da gudummawa ga tsarin manufofi a dukkan matakai.
Ya lura cewa babbar manufar ita ce tara masu ruwa da tsaki daban-daban don tattaunawa, da kuma gano kokarin bayar da shawarwarin hadin gwiwa don dorewar zaman lafiya.
Dokta Ukoha Ukiwo, Shugaban kungiyar SPRING, ya bayyana horon a matsayin wata muhimmiyar dama ga masu ruwa da tsaki a ayyukan yaki da tsaro.
Ya ce ƙungiyoyin da suka ƙunshi ƙungiyoyin jama’a (CSOs), shugabannin gargajiya da na addini sun sami damar koyo da kuma gudanar da zaman taro mai fa’ida wanda zai haɓaka yunƙurin haɗin gwiwa ga al’ummomin da suke karkashin su.(NAN)
