Sama da fursunoni 100 da suka hada da wadanda aka yankewa hukuncin kisa a cibiyoyin tsare-tsare a jihar Kano sun nemi a yi musu afuwa.
Kwanturola na hukumar kula da gidajen yari ta kasa (NCoS) a jihar, Suleiman Inuwa ne ya bayyana haka a lokacin da jami’an kwamitin jin kai na jihar karkashin jagorancin shugaba Azumi Namadi-Bebeji suka ziyarci cibiyar tsaro mafi girma da ke Janguza.
Karin labari: Sojin Najeriya sun bayyana dalilin sakin ‘yan ta’addan gwamnatin Borno
A cewar wata sanarwa da mai magana da yawun hukumar NCoS Kano, Musbahu Kofar-Nassarawa, ya fitar ranar Alhamis a Kano, Mista Inuwa ya ce wadanda ke neman afuwa sun hada da wadanda ke zaman gidan yari da masu fama da matsalar lafiya da kuma tsofaffi.
“Daga cikin fursunonin, da dama sun riga sun gama daukaka kara, yayin da wasu ke neman a yi musu sassauci,” in ji Mista Inuwa kuma ya bukaci kwamitin da ya lura da kararrakin.
Karin labari: Majalisar wakilan Najeriya na shirin kwato jirage 2 na NCAT Zariya da aka sayar
Ya yabawa shugaban kwamitin na shirin ciyarwa a watan Ramadan.
Manajan ya kara da cewa “Muna farin ciki da sakamako mai kyau na rage cunkoso a wuraren da ake tsare da su.”
Da ta ke mayar da martani, shugabar kwamitin, Misis Namadi-Bebeji, ta ce gwamnati za ta duba yanayin su ne bisa la’akari da halin da suke ciki a lokacin da suke tsare.
Karin labari: Gwamnan Kano ya tallafawa Alhazai 2,906 kowannen su da Naira 500,000
“Zan gabatar da kararrakinsu ga Gwamnan Jihar Kano,” in ji Misis Namadi-Bebeji, ta kuma shawarci fursunonin da su bi ka’idojin gidan yari, su kuma koyi zama masu amfani ga kansu da kuma al’umma.
Ta yabawa fursunonin da suka haddace kur’ani mai girma da kuma wadanda suka samu maki 9 a hukumar jarrabawa ta NECO da kuma neman shiga Budaddiyar Jami’ar Najeriya.
