Tattaunawa tsakanin Gwamnatin Tarayya da Kwamitin Hadin Gwiwa (JAC) na kungiyoyin ma’aikatan da ba malamai ba a jami’o’i ta kare ba tare da cimma matsaya ba a ranar Litinin a Abuja, yayin da manyan batutuwa suka rage ba a warware ba.
JAC ta kunshi Kungiyar Manyan Ma’aikatan Jami’o’in Najeriya (SSANU) da Kungiyar Ma’aikatan da Ba Malamai Ba na Cibiyoyin Ilimi da Kungiyoyi Masu Alaka (NASU).
Taron, wanda Ministan Ilimi, Dr. Tunji Alausa, ya kira, an dage shi zuwa 5 ga Mayu da karfe 3 na yamma don ci gaba da tattaunawa.
Kamfanin Dillancin Labarai na Kasa (NAN) ya rawaito SSANU da NASU sun fara yajin aikin sai-baba-ta-gani a ranar 30 ga Afrilu bayan cikar wa’adin wata guda da suka ba gwamnatin tarayya kan sake tattauna yarjejeniyar 2009.
Kungiyoyin na nuna rashin amincewa da karin albashi na kaso 30 da gwamnatin tarayya ta gabatar, suna nacewa kan daidaita kaso 40 ta hanyar tattaunawa ta gama-gari.
Gwamnatin tarayya ta janye tayin kaso 30 din a baya, wani mataki da kungiyoyin suka bayyana a matsayin na kadai kuma ba tare da tuntuba mai kyau ba.
Da yake magana kan yajin aikin, Shugaban SSANU, Mista Mohammed Ibrahim, ya ce an bi umarnin yajin aikin bakin bai daya a fadin kasa, lamarin da ya gurgunta ayyukan gudanarwa da muhimman ayyuka a jami’o’i.
“Bukatunmu ba su canza ba, muna neman adalci, daidaito da kuma kulawa mai kyau ga mambobinmu.
Matsayin kaso 40 shi ne mafi kankanta da za mu iya amincewa da shi, kuma yajin aikin na ci gaba har sai an samu ci gaba mai ma’ana,” in ji shi.
Ibrahim ya ce ofisoshin gudanarwa, asibitoci, dakunan kwanan dalibai da sassan kudi an rufe su a fadin jami’o’i saboda cikakken bin umarnin yajin aikin.
A halin yanzu, Jami’ar Maiduguri (UNIMAID) ta dage jarrabawarta ta intanet saboda hargitsin da yajin aikin ya haifar.
Cibiyar, a cikin wata takarda da ta fito daga Ofishin Mataimakin Shugaban Jami’a kuma mai daidaita jarrabawa da jadawalin lokaci, Farfesa Dani Mamman, ya sanya wa hannu, ta ce za a sake tsara jarrabawar har sai an dakatar da yajin aikin.
“Duba da yajin aikin ma’aikatan da ba malamai ba, za a sake tsara jarrabawar da aka ambata a sama har sai an dakatar da yajin aikin da ake ciki.” (NAN)
