Shugaban kasa Muhammadu Buhari ya sha alwashin cewa rundunar soji za ta ci gaba da daukar kwararan matakai kan ‘yan bindiga da ke addabar yankin Arewa maso Yamma.
Buhari ya yi wannan alwashi ne a ranar Alhamis a lokacin da yake bude cibiyar ilmantarwa ta Muhammadu Indimi da kuma taron kasa da kasa a jami’ar Maiduguri.
A cewar shugaba Buhari “Na ba da umarni kuma na fara karbar kayan aikin soja daga Amurka, jiragen sama na soja, jirage masu saukar ungulu da motoci masu sulke kuma za mu sha wuya sosai a kansu (‘yan fashi).
Shugaban wanda ya ji dadin yadda tsaro ya inganta a yankin Arewa maso Gabas, ya koka da ayyukan ‘yan bindiga a yankin Arewa maso yamma.
“Ina rokon ‘yan Najeriya da su gaya wa masu karancin ilimi cewa a Afirka, mu ne kasa mafi girma kuma mu ne mafiya arziki. Mu yi amfani da wannan baiwar da Allah ya yi mana wajen baiwa al’ummarmu da yankinmu da nahiyarmu gaba maimakon bata lokacinmu.”
