Shugaban ƙasa Bola Tinubu, zai yi wa al’ummar Najeriya jawabi a kafafen watsa labarai a ranar Lahadi da misalin ƙarfe 7 na safe.
Mai magana da yawun shugaban ƙasa, Ajuri Ngelale ne, ya sanar da hakan cikin wata sanarwa da ya fitar da yammacin ranar Asabar.
Za a haska jawabin shugaban a kafafen yaɗa labarai daban-daban.
Wannan dai na zuwa ne bayan da aka shiga rana ta uku ta zanga-zangar kawo ƙarshen gurɓataccen shugabanci da kuma yunwa a ƙasar.
Zanga-zangar ta faro ne a ranar Alhamis a faɗin Najeriya.
A wasu jihohin an yi zanga-zangar cikin lumana ba tare da samun tashe-tashen hankula ba.
A jihohin Kano, Yobe, Borno, Jigawa, Katsina da sauransu an samu tashe-tashen hankula, lamarin da ya kai ga lalata kadarorin gwamnati da wawushe dukiyar al’umma.
Tuni aka sanya dokar hana fita a jihohin Kano, Borno da kuma Yobe.
Sai dai da safiyar ranar Asabar, Gwamnan Jihar Borno, Babagana Umara Zulum ya sassauta dokar hana fita a jihar.
A Jihar Kano, kuwa al’amura na ci gaba da ta’azzara duk da dokar hana fita da gwamnatin jihar ta sanya.
