Asusun ba da lamunin karatu ga daliban Najeriya NELFund, ya ce ya raba sama da Naira biliyan 2.5 ga manyan makarantu 12 a fadin kasa baki daya.
Kakakin asusun, Nasir Ayitogo, ne ya bayyana hakan a wata sanarwa a ranar Juma’a a Abuja, ya ce dalibai 22,120 ne suka ci gajiyar wannan shirin.
A cewar Ayitogo, shirin ya yi daidai da kudurin Shugaba Bola Tinubu na inganta ilimi ga ‘yan Najeriya.
Ya ce hakan na nufin tabbatar da cewa daliban da suke bukatar kudaden za su ci gaba da karatunsu sun samu.
Ayitogo ya ce an bayar da kudaden ne bisa tsarin manhajar karatu na kowa ce makaranta.
“Ya zuwa yanzu, shida daga cikin cibiyoyi 12 sun sami cikakken biyan kudaden makarantunsu, wanda ya kai sama da dalibai 20,000. Adadin da aka rabawa wadannan cibiyoyi ya kai kusan N2,026,163,340. Wasu shida kuma za su karɓi kuɗinsu a cikin mako mai zuwa.
“Wadannan kuɗaɗen za su tabbatar da cewa ɗaliban Nijeriya za su iya ci gaba da ayyukansu na ilimi ba tare da tsangwama ba, tare da samar da kwanciyar hankali da ake buƙata ga waɗannan ɗaliban da iyalansu,” in ji shi.
Ayitogo ya ce NELFUND ta kuma fara biyan kudaden kula da dalibai baya ga kudaden makarantar.
A cewarsa, wannan shiri zai samar da muhimman tallafi na kudi domin ciyar da rayuwa saboda an ware Naira miliyan 442 na watan Yuli.
“Biyan kuɗi za su amfana da dukkan ɗalibai 22,120 a cikin cibiyoyi 12, tare da ƙarin zuwa nan da makonni da watanni masu zuwa.
“Wannan yana nuni ne da kudurin gwamnatin tarayya na samar da walwala da kuma nasarar karatun daliban Najeriya a cibiyoyin gwamnati.
“Wadannan alkaluma suna nuna jajircewar NELFUND don tabbatar da cewa matsalolin kuɗi ba su hana ayyukan ilimi ba. NELFUND ta yi imanin cewa wadannan kudaden za su sauƙaƙa wa ɗalibai da iyalansu matsalolin kuɗi sosai, wanda zai ba su damar mai da hankali kan karatunsu da kuma ayyukan da za su yi a nan gaba.
(NAN)
