Sen. Heineken Lokpobiri, Karamin Ministan Albarkatun Man Fetur (man) ya kira wani babban taro da masu ruwa da tsaki a harkar mai da kuma fannin man fetur domin warware matsalolin da suka dabaibaye matatar man Dangote.
Hakan na kunshe ne cikin wata sanarwa da Nneamaka Okafor ta fitar mai bawa Ministan shawara na musamman kan harkokin yada labarai da sadarwa.
Taron wanda aka gudanar a ranar Litinin a Abuja ya samu halartar Alhaji Aliko Dangote, Shugaban Kamfanin Dangote Group da Mista Farouk Ahmed, Shugaban Hukumar, Nigerian Midstream and Downstream Petroleum Regulatory Authority (NMDPRA).
Sauran sun hada da Mista Gbenga Komolafe, Shugaban Hukumar, Nigerian Upstream Petroleum Regulatory Commission (NUPRC) da Malam Mele Kyari, Babban Jami’in Rukunin Kamfanin Man Fetur na Najeriya (NNPC Ltd).
Karin labari: Tuna Baya: Yadda Shugaba Tinubu da tawagarsa ke zanga-zangar matsin rayuwa a 2012
Idan dai ba a manta ba a baya-bayan nan takun saka a masana’antar ya gamu da rashin jituwa tsakanin shugabannin kamfanonin Dangote, NMDPRA da kuma NNPC Ltd kan wasu batutuwan da suka shafi man fetur.
Dangote ya bayyana cewa yanzu kamfanin na NNPC bai mallaki kashi 20 cikin 100 na matatun man ba, yana mai jaddada cewa yanzu haka kamfanin mai na Najeriya yana da kashi 7.2 cikin 100 na matatar ne saboda rashin biyan ma’auni na hannun jarin da ya samu a watan Yuni.
Sai dai kuma kamfanin na NNPC ya ce an yanke shawarar kashe kudaden da aka biya kuma aka sanar da matatar Dangote watanni da dama da suka gabata.
Karin labari: Jihohi 20 a Najeriya ciki harda Kano sun samu sabbin kwamandojin FRSC
Hukumar ta NMDPRA ta kuma samu sabani tsakaninta da Dangote a kan batutuwan da suka shafi lasisi, wanda hukumar ta ce matatar ta Dangote ta fara aiki tun kafin fara aiki, yayin da man diesel din ya gaza ka’idojin kasa da kasa.
Dangote, ya karyata matsayin NMDPRA kan batun.
Dangote ya kuma zargi Kamfanonin Mai na Duniya (IOCs) da kawo cikas ga ayyukan matatar mai ta hanyar sayar musu da danyen mai ta hanyar kasuwancinsu na kasashen waje suna ba da kaya akan dala biyu zuwa hudu kan kowace ganga, sama da farashin NUPRC.
Dangane da hakan, ministan ya kira taron domin samar da mafita mai dorewa kan matsalar da ta addabi matatar man Dangote, inda dukkanin bangarorin suka nuna aniyar hada kai da magance matsalolin.
Karin labari: Rundunar sojin Najeriya ta mika wata ‘yar Chibok da ta kubutar ga Gwamnatin Borno
Lokpobiri ya jaddada muhimmancin hadin kai a tsakanin masu ruwa da tsaki.
Ya ce zai tabbatar da samun nasara da kyakkyawan aiki a fannin mai da iskar gas, wanda ya bayyana a matsayin jigon ci gaban tattalin arzikin Najeriya da samar da makamashi.
Masu ruwa da tsakin sun bayyana godiyar su ga ministan bisa kyakkyawan jagoranci da kuma sa baki wajen gudanar da tattaunawa a kan lokaci.
Taron ya nuna wani muhimmin mataki na warware kalubalen da kuma nuna himma da kwazo da ministan ya yi na samar da yanayi mai kyau ga bangaren man fetur da iskar gas na Najeriya.
Zuwan matatar Dangote da ta kai dalar Amurka biliyan 20 mai karfin tace ganga 650,000 a kowace rana (bpd) a shekarar 2023, ya ba da kwarin gwuiwa ga bangaren man fetur na kasar domin tabbatar da cewa Najeriya ba ta dogara da man fetur daga ketare ba kamar yadda NAN ta tabbatar.
