Majalisar wakilai a Najeriya ta yi barazanar daukar mataki kan hukumomi da kamfanonin da suka gaza gurfana a gaban kwamitin a binciken asarar dala biliyan 60 da gwamnatin tarayya ta yi.
Adadin kudaden da aka zayyana makudan kudade ne daga yarjejeniyar hadin gwiwa ta Kamfanin Man Fetur na Najeriya (NNPCL).
Kwamitin hadin gwiwa na majalisar wakilai kan harkokin kudi da albarkatun man fetur (Upstream) ya yi wannan barazanar ne a ci gaba da zaman binciken da ta yi ranar Litinin a Abuja.
Kwamitin hadin guiwar wanda dan majalisa James Faleke shugaban kwamitin kudi da kuma dan majalisar wakilai Alhassan Ado-Doguwa shugaban albarkatun man fetur ya nuna takaicinsa kan rashin halartar shugabannin kamfanoni da hukumomin da aka gabatar a gabansa.
Karin labari: “Wasu Jami’ai a Gwamnati sun ci zarafina don naki sanya hannu kan lamunin dala miliyan 500” – Minista
Kwamitin ya yi Allah-wadai da yadda wasu ‘yan tsirarun da suka zo taron suka yi, tare da yin Allah-wadai da dabi’ar aika wakilai daga kamfanoni da hukumomin da aka gayyata.
Ado ya ce kwamitin ba zai yi wasa da masu kokarin yi wa kundin tsarin mulkin kasar zagon kasa ba.
Dan majalisar ya ce hukumomin sun hada da makudan kudade da za’a yi amfani da su wajen inganta rayuwa da rayuwar ‘yan Najeriya don haka dole ne a dauki mataki.
Ya ce, “Ga wadanda ba su zo ba, akwai kamfanoni da hukumomi da dama da aka gayyata, kuma kamar ba su damu da gayyatar wannan muhimmin kwamiti ba.
Karin labari: “A shirye nake na sayarwa da kamfanin NNPC matatar Mai na” – Dangote
“Ga wadanda suka zabi yin watsi da abin da majalisar ke yi a nan, wannan kwamiti ba zai yi wasa da wani ko wata hukuma da ke son zagon kasa ga ikonmu ba,” inji shi.
Doguwa ya ce za a tilasta wa kwamitin ya ci gaba da yin kira tare da samar da duk wata hanya da za ta iya amfani da damar da doka ta tanada don tabbatar da cewa duk wanda aka gayyata ya bayyana.
Ado-Doguwa ya lissafa wasu kamfanoni da hukumomin da ke cikin binciken sun hada da Total Exploration da Shell Petroleum da Agip da Chevron da Oando kuma Mobile da Pan Ocean tare da Erotton da Belema da First Exploration da New Cross Exploration.
Sauran sun hada da Seplat Petroleum, da Amini International Petroleum, da West Africa Exploration and Production Limited, da kuma Walter Smith Petroleum Ltd tare da Western Sahara Energy Ltd da dai sauransu, kamar yadda NAN ta wallafa.
