Tsohon Sanata Shehu Sani, wanda ya wakilci yankin Kaduna ta tsakiya a majalisar wakilai ta 8, ya bayyana damuwarsa kan tabarbarewar tattalin arzikin Najeriya, inda ya danganta lamarin da rufe kasuwancin da wasu ‘yan kasashen yammacin duniya ke yi a kasar.
Ya yi nuni da cewa, wadannan ‘yan kasuwan suna rufe harkokinsu ne saboda rashin kyamar yanayin kasuwanci.
Sanata Sani ya bayyana haka ne a shafin sa na X da aka tabbatar a ranar Laraba.
Jaridar SolaceBase ta rawaito cewa, matsanancin matsin tattalin arziki da hauhawar farashin kayayyaki manyan kalubale ne da ke addabar ‘yan Najeriya, musamman talakawa, lamarin da ke kara jefa rayuwa cikin wahala.
Karin labari: Da Dumi-Dumi: Majalisar Dattawan Najeriya ta cire Ndume daga mukamin mai tsawatarwar majalisar
Tsohon dan majalisar ya yi mamakin dalilin da yasa kamfanonin kasar Sin ba sa rufewa, ko da a cikin yanayin rashin tsaro.
“Har yanzu ina mamakin dalilin da yasa kamfanonin kasar Sin ba sa rufewa; Har ila yau, Sinawa suna nan a kauyukan da ‘yan bindiga suka mamaye kauyukan Zamfara da Kaduna da Neja da Nasarawa,” in ji shi.
Ya yi nuni da cewa, Sinawa a wadannan jihohin suna gudanar da ayyukan hakar ma’adinai na zinare, gypsum, kaolin, da lithium. “Wane irin mutane ne Sinawa?” Ya tambaya.
