Jam’iyyar NNPP reshen Jihar Kano ta sanar da korar ɗan majalisar tarayya Abdulmumin Jibrin Kofa bisa zargin gudanar da ayyukan adawa da jam’iyya da kuma kin biyan kuɗaɗen da ya wajaba.
Hakan ya biyo bayan hirar da Jibrin ya yi a tashar Channels TV a kwanakin baya, inda ya bayyana cewa Sanata Rabiu Musa Kwankwaso na buɗe ga tattaunawa kan yiwuwar komawa jam’iyyar APC.
Jibrin, wanda ake ganin yana da kusanci da jagoran Kwankwasiyya, ya kuma ziyarci Shugaba Bola Ahmed Tinubu sau biyu a kwanakin nan, abin da ya haifar da fassarori cewa yana share fage ne domin yiwuwar dawowar Kwankwaso cikin APC.
Shugaban NNPP a Kano, Hashim Sulaiman Dungurawa, ya shaida wa manema labarai a ranar Asabar cewa an ɗauki matakin korar Jibrin ne sakamakon zarge-zargen da ya sha yi wa jam’iyya da shugabancinta a kafafen yada labarai.
A cewarsa, Jibrin ɗan siyasa ne marar ƙarfi wanda nasarar zabensa ta faru ne kawai ta dalilin Kwankwasiyya da NNPP, ba wai ƙarfin kansa ba. Ya ce kwamitin sulhu an kafa shi domin sasanta batun, amma Jibrin ya ƙi bin hanyar tattaunawa ya ƙara bayyana biyayya ga jam’iyya ta waje.
Dungurawa ya kuma zarge shi da kin biyan kuɗin da kowane memba ya wajaba ya rika biya, inda ya ce jam’iyyar za ta gurfanar da shi a kotu domin karɓo bashin.
Ya ƙara da cewa ko da Jibrin ya koma APC hakan ba zai raunana NNPP ba, domin siyasa tana kan haɗin kai da ƙungiya, kuma Kwankwasiyya na nan daram tare da jagoranta, Rabiu Musa Kwankwaso.
