Alamun karancin man fetur na kara bayyana a Kano yayin da wasu gidajen mai a fadin birnin suka rufe, yayin da wadanda ke sayar da fetur suka kara farashin lita zuwa sama da Naira 1,000.
Ziyarar da Solacebase ta kai wasu gidajen mai a ranar Asabar ta nuna cewa kadan ne daga cikinsu ke sayar da fetur, inda farashin ya kai tsakanin Naira 1,050 zuwa Naira 1,084 kan kowace lita, wanda ya yi matukar karuwa idan aka kwatanta da farashin da ya gabata na kusan Naira 900 kan kowace lita.
A gidan mai na NNPC Retail Limited da ke kan titin Murtala Muhammed Way, an nuna farashin fetur Naira 1,084 kan kowace lita, sai dai a lokacin ziyarar ba a sayar da man a wurin ba.
Sai dai a gidan mai na Fara Fara da ke kan titin Hadejia Road ana sayar da fetur kan Naira 1,060 kowace lita.
Haka kuma gidan mai na Aliko Oil da ke kan titin Independent yana sayar da fetur kan Naira 1,060 kowace lita, yayin da gidan mai na IMG ke sayar da fetur kan Naira 1,050 kowace lita.
Lamarin ya jawo damuwa a tsakanin direbobi da masu sana’ar sufuri, inda wasu daga cikinsu suka koka kan karin farashin da kuma wahalar samun man fetur.
Daya daga cikin direbobin adaidaita sahu da aka tattauna da shi, Ibrahim Musa, ya shaida wa Solacebase cewa karin farashin zai yi matukar tasiri ga abin da suke samu na yau da kullum.
Ya bayyana cewa kudin gudanar da aikin tukin adaidaita sahu ya riga ya karu, kuma idan haka ya ci gaba, za su iya tilastuwa su kara kudin mota.
“Mu ne muka fi ji saboda kullum muna sayen fetur. Idan farashin ya ci gaba da haka, ba za mu samu wani zabi ba face mu kara kudin da muke karba daga fasinjoji,” in ji Musa.
Wani direban adaidaita sahu, Abubakar Umar, shi ma ya nuna damuwa kan yadda matsalar fetur ke kara bayyana, yana mai cewa lamarin ya fara shafar masu aikin sufuri.
A cewarsa, wasu gidajen mai sun kasance a rufe tun safe, wanda ya tilasta direbobi zagayawa cikin gari suna neman wuraren da ake sayar da fetur.
Ya kara da cewa hakan na dagula aikinsu tare da rage yawan zirga-zirgar da za su iya yi a rana guda.
Wani mai mota mai zaman kansa, Hassan Badamasi, shi ma ya koka kan karin farashin da ya faru ba zato ba tsammani, yana mai cewa direbobi ba su da wani zabi face sayen fetur a duk farashin da suka samu.
Badamasi ya ce idan lamarin ya ci gaba, zai iya haifar da tururuwar sayen fetur a tsakanin mazauna birnin.
“A baya muna sayen fetur kusan Naira 900 kowace lita, amma kwatsam ya haura Naira 1,000. Idan hakan ya ci gaba, mutane na iya fara tururuwar zuwa gidajen mai domin tara fetur,” in ji shi.
Wasu mazauna Kano na ganin cewa halin da ake ciki na iya nasaba da tashin hankalin da ke kara kamari a yankin Gabas ta Tsakiya, musamman rikicin da ya shafi Iran da Amurka da kuma Isra’ila, wanda masana ke cewa zai iya shafar samar da mai da farashinsa a duniya.
Ko da yake babu wata sanarwa a hukumance da ta danganta lamarin da abubuwan da ke faruwa a kasashen waje, masu sa ido sun ce idan hakan ya ci gaba, zai iya haddasa tururuwar sayen fetur tare da kara tsananta karancin man a fadin birnin.
A ranar Juma’a farashin danyen mai ya kai kusan Dala 91 kan kowace ganga yayin da rikicin Gabas ta Tsakiya ke kara tsananta.
