Dubban mazauna jihar Kano sun tarbi Gwamna Abba Kabir Yusuf a ranar Asabar bayan dawowarsa daga ganawa da shugabannin APC a Abuja.
Kamfanin dillancin labarai na ƙasa NAN ya rawaito cewa Yusuf na cikin tawagar APC da ta je jihar Bauchi domin jawo hankalin gwamna Bala Mohammed ya koma jam’iyyar daga PDP.
Har yanzu Bala Mohammed bai bayyana sabuwar jam’iyyarsa ba bayan sabanin da ya samu da PDP.
Taron jama’ar ya yi kama da wanda aka gani a lokacin da Rabiu Musa Kwankwaso ya karbi bakuncin Peter Obi na ADC, wanda hakan ya ja hankalin jama’a sosai a baya.
Kwankwaso ya fice daga NNPP tare da hada kai da Obi da sauran ‘yan adawa a ADC, abin da ya kara rura wutar rikicin siyasa a jihar.
Ana sa ran wadannan sauye-sauye za su taka muhimmiyar rawa yayin da manyan ‘yan siyasa ke fafatawa domin samun rinjaye a jihar Kano, wacce ke da muhimmanci wajen tantance wanda zai lashe zaben shugaban kasa a Najeriya.
Magoya bayan Yusuf sun cika hanyoyi daga filin jirgin sama na Malam Aminu Kano zuwa Kofar Mata har zuwa gidan gwamnati, suna daga tutoci tare da rera wakokin goyon baya, lamarin da ya dauki kama da shagalin biki yayin wucewar jerin gwanonsa.
Wasu mazauna Kano da suka zanta da NAN sun bayyana tarbar a matsayin daya daga cikin manyan gangamin jama’a da aka gani a ‘yan kwanakin nan.
Sun ce hakan ya nuna irin karfin da gwamnan ke da shi a matakin kasa, duk da sauye-sauyen siyasa da ke faruwa a jihar Kano.
Kwankwaso, wanda ake ganin babban jigo ne a siyasar Kano kuma jagoran tafiyar Kwankwasiyya, ya dade yana taka muhimmiyar rawa a tsarin siyasar jihar.
Ficewarsa daga NNPP da kiransa ga magoya bayansa su bi sahun ADC ya kara tsananta rabuwar kai a siyasar jihar.
Wannan ci gaba ya biyo bayan sauye-sauye da suka hada da ficewar gwamna Yusuf daga NNPP zuwa APC mai mulki a matakin kasa, wanda ya kara karfi ga sauyin kawance a siyasar jihar.
Alhaji Abubakar Umar na Unguwar Waibai ya bayyana tarbar da jama’ar Kano suka yi wa gwamnan a matsayin abin tarihi.
Hajiya Habiba Nasiru ta ce yawan jama’ar da suka fito zai bayyana a zaben 2027, inda ta ce jama’ar Kano sun riga sun bayyana matsayinsu.
Hajiya Zainab Abu ta Hotoro ta kuma bayyana cewa za su zabi Yusuf a zaben 2027 saboda yadda take ganin yana da ‘yancin kansa.
Alhaji Mubarak Isa na yankin Rijiyar Zaki ya ce Kano ta fi samun ci gaba a karkashin Yusuf, yana mai cewa gwamnan ya kashe sama da naira biliyan 46 wajen gina hanyoyin cikin gari guda 17 a kananan hukumomi takwas.
‘Yan kasuwa, dalibai, kungiyoyin mata da magoya bayan jam’iyya sun rika nuna farin ciki tare da daga hannuwa yayin wucewar ayarin motoci, yayin da jami’an tsaro suka tabbatar da zaman lafiya.
Masu lura da harkokin siyasa sun ce wannan lamari na nuna karuwar fafatawa tsakanin manyan kungiyoyin siyasa a Kano.
Wani mai sharhi kan siyasa, Musa Isa daga karamar hukumar Gwale, ya ce ficewar Kwankwaso zuwa ADC ya sauya tsarin siyasa, amma taron jama’ar ya nuna cewa Yusuf har yanzu yana da goyon bayan jama’a a matakin kasa.
Jihar Kano na daga cikin jihohin da suka fi tasiri a siyasar Najeriya, kasancewar tana da yawan masu kada kuri’a da kuma tasiri wajen tantance sakamakon zabukan kasa.
