A ranar Lahadi ne gwamnatin Zamfara ta sanar da bude wasu makarantun firamare da sakandare a ranar Litinin 17 ga watan Janairu.
Bayanin hakan na kunshe ne a cikin wata sanarwa da Malam Shehu Ibrahim, mukaddashin Daraktan tabbatar da ingancin aiki a ma’aikatar ilimi ya fitar.
Sanarwar ta ce makarantun gwamnati da masu zaman kansu waɗanda ma’aikatar ta ware a matsayin “kore” da “rawaya” ya kamata su koma don ayyukan ilimi na yau da kullun.
“Duk da haka, makarantun da ke cikin “ja” zasu ci gaba da kasancewa a rufe har sai lokacin da yanayin tsaro ya inganta,” in ji Ibrahim a cikin sanarwar.
Makarantun dai na ci gaba da komawa ne biyo bayan rufe dukkan makarantun a ranar 1 ga Satumba, 2021, lokacin da ‘yan bindiga suka yi garkuwa da dalibai 80 da malamai uku daga makarantar Sakandaren Gwamnati ta Kaya a karamar hukumar Maradun (LGA).
Daga baya biyar daga cikin daliban sun tsere kwanaki kadan bayan sace su yayin da sauran dalibai 75 da malamansu aka ceto daga baya.
A baya ‘yan bindigar sun yi garkuwa da dalibai mata 279 na Makarantar Sakandaren ’Yan Mata ta Gwamnati da ke Jangebe a karamar Hukumar Talata Marafa.
Duk da haka ‘yan bindigar sun sako dukkan ‘yan matan a ranar 2 ga Maris, 2021 bayan tattaunawa da gwamnati da dama.
“Jami’ai daga ma’aikatar ilimi da kuma daraktocin shiyya za su zagaya don ganin matakin da aka bi,” in ji sanarwar.
