Rundunar ‘yan sandan Najeriya ta kama dakataccen sashin leken asiri na rundunar ‘yan sandan Najeria DCP Abba Kyari.
Rahotanni sun bayyana cewa an kama shi ne tare da wasu mutane hudu ranar Litinin.
An kama Kyari ne sa’o’i kadan bayan da hukumar yaki da fataucin miyagun kwayoyi ta kasa ta bayyana cewa ana neman sa bisa zargin alaka da miyagun kwayoyi.
DCP Kyari yana ci gaba da fuskantar bincike bayan da hukumar binciken manyan laifuka ta Amurka ta tuhume shi da laifin zamba da ya shafi fitaccen mutumin nan na Instagram, Ramon Abbas, wanda aka fi sani da Hushpuppi.
Wani babban jami’in ‘yan sanda a hedikwatar rundunar ya shaida wa wakilinmu cewa an kama Kyari kamar yadda ake kama kowane mutum da ake zargi, kuma an daure shi da ankwa.
“An kama shi. An daure shi kuma za a mika shi ga hukumar da ta dace. Ba a nuna masa wani fifiko,” in ji dan sandan.
Da aka tuntubi kakakin rundunar, CSP Olumuyiwa Adejobi, shi ma ya tabbatar da kama Kyari ga PUNCH.
Sai dai bai bayar da cikakken bayani ba, yana mai cewa nan ba da jimawa ba za a fitar da sanarwar manema labarai.
Da aka nemi tabbatar da kama Kyari, Adejobi ya amsa da cewa, “Eh da wasu hudu. Za a fitar da sanarwa nan ba da jimawa ba.”
