Dubban masunta a ranar Asabar sun yi cincirindo sun shiga kogin Matan Fada da ke Argungu gabanin isowar Shugaba Bola Ahmed Tinubu a bikin karshe na Bikin Kamun Kifi da Al’adu na Duniya na Argungu a shekarar 2026.
Lamarin ya sauya tsarin da aka tsara, yayin da masunta cikin kayan gargajiya dauke da taru da ludayin kalaba suka shiga ruwa domin fara gasar kamun kifi.
Wasu daga cikin masu takarar sun shafe lokaci suna jira a wurin da aka ware tun karfe 5:00 na safe.
Kamfanin Dillancin Labarai na ƙasa (NAN) ya ce har zuwa lokacin hada wannan rahoto da misalin karfe 12:45 na rana, ana ci gaba da jiran isowar Shugaban Kasa tare da Gwamnan Jihar Kebbi, Nasir Idris, da sauran manyan baki a wurin bikin a kogin Matan Fada.
Jadawalin taron ya nuna cewa gasar kamun kifi da rabon kyaututtuka za su gudana daga karfe 8:00 na safe zuwa 2:00 na rana.
Kokarin jami’an tsaro da masu shirya bikin na shawo kan lamarin bai yi nasara ba, domin masuntan sun fara gasar kafin isowar bakin na musamman.
Duk da rashin isowar Shugaban Kasa da sauran manyan baki, an ci gaba da gasar kamun kifin ta gargajiya a gaban dubban masu kallo da suka yi cincirindo a bakin kogi.
Bikin Argungu karo na 61 ya jawo mahalarta da masu yawon bude ido daga sassa daban-daban na Najeriya da kasashe makwabta, abin da ya kara tabbatar da matsayinsa a matsayin daya daga cikin manyan bukukuwan al’adu da yawon bude ido a Afirka.
Manyan baki da ake sa ran za su halarta sun hada da manyan jami’an gwamnati, ‘yan diflomasiyya, sarakunan gargajiya da shugabannin masana’antu.
