Kungiyar likitocin Najeriya, NMA, ta ce kasar ta yi asarar sama da Likitoci 9,000, inda suka koma kasashen Yamma tsakanin shekarar 2016 zuwa 2018.
Shugaban kungiyar ta NMA, Farfesa Innocent Ujah ya bayyana haka a taron lacca na shekara-shekara na kungiyar a Abuja ranar Litinin.
Ujah ya nuna damuwa game da kalubalen da bangaren kiwon lafiya ke fuskanta.
Shugaban NMA ya bayyana hakan a matsayin dalilin da ya kawo karancin ma’aikata a fadin kasar nan, inda a halin yanzu duk likita da ya yake duba marasa lafiya 5000.
Da yake bayani kan illar wannan ta’ada ga tsarin kiwon lafiyar kasar, Farfesa Ujah, wanda kuma shi ne Mataimakin Shugaban Jami’ar Kimiyyar Kiwon Lafiya ta Tarayya, Otukpo, ya ce Afirka, ciki har da Najeriya, na fuskantar matsalar ma’aikatan lafiya.
Ya ce illar ci gaban tattalin arzikin kasar shi ne rage kudade da zuba jari a fannin kiwon lafiya, da fadada gibin ababen more rayuwa da yadda al’ummar Najeriya ke kara nuna rashin amincewa da tsarin kiwon lafiyar Najeriya.
Karamin Ministan Lafiya, Olorunnimbe Mamora ya ba da shawarar samar da aikin na shekara-shekara don nemo hanyoyin magance matsalolin rashin ma’aikata da sauran kalubalen da ke kawo cikas ga fannin kiwon lafiyar kasar.
Hakazalika, shugaban kungiyar malaman jami’o’in, ASUU, wanda Dakta Chris Piwuna ya wakilta, ya nuna damuwarsa kan rashin kayan aikin likita a wasu kwalejojin likitanci a fadin kasar nan.
Taken lacca na bana shi ne zubar da kwakwalwa da yawon shakatawa na likitanci: mugunyar tagwaye a tsarin kiwon lafiyar Najeriya.
