Tsohon mataimakin dan takarar gwamna na jam’iyyar APC a jihar Kano, Hon. Murtala Sule Garo, ya yi ta’aziyyar guda daga cikin mafi girma a majalisar masarautar Kano, Galadiman Kano Alhaji Abbas Sunusi Bayero, wanda ya rasu yana da shekaru 92 a duniya.
A wata sanarwa da ya sanya wa hannu a ranar Laraba, Garo ya bayyana marigayi Galadiman Kano a matsayin wani dattijo mai daraja wanda ya bayar da gudunmawa sosai ga ci gaban Kano da kuma gargajiya.
“Rasuwar Alhaji Abbas Sunusi babban rashi ne, ba ga iyalansa kadai ba, ga daukacin Masarautar Kano da al’ummar jihar baki daya, ya kasance mutum ne mai hikima da rikon amana, wanda jagoranci da shugabancinsa ba su da cikas.” Inji Garo.
Murtala Sule Garo, tsohon kwamishinan kananan hukumomi da masarautu, ya kuma yi addu’ar Allah ya jikan marigayin, ya kuma baiwa iyalai ikon jure rashin da ba za a iya kwatantawa ba.
Jaridar SolaceBase ta ruwaito cewa, Alhaji Abbas Sunusi ya rasu a daren ranar Talata, ya bar ‘ya’ya da jikoki da dama.
An haife shi a shekarar 1933 a garin Bichi ya taba zama Wamban Kano kafin Sarki Sanusi Lamido Sanusi ya nada shi sarautar Galadiman Kano a shekarar 2014.
A tsawon rayuwarsa, ya shahara da jajircewarsa ga harkar gargajiya da kuma irin gudunmawar da yake bayarwa a fagen zamantakewa da siyasar Kano.
An gudanar da Sallar jana’izarsa kamar yadda addinin Musulunci ya tanada, inda ya samu halartar manyan baki da ‘yan uwa da sauran masu yi mata fatan alheri daga sassa daban-daban na rayuwa.
