Mambobin ƙungiyar Ma’aikatan Manyan Makarantun Ƙasar nan (SSANU) da ta Ƙungiyar Ma’aikatan da ba Malamai ba (NASU) sun gudanar da zanga-zangar lumana a Jami’ar Bayero ta Kano a ranar Alhamis, bisa umarnin kwamitin haɗin gwiwa na ƙasa (JAC) na ƙungiyoyin biyu.
Kwamitin JAC na ƙasa ya bayar da umarnin cewa duk rassan ƙungiyoyin su gudanar da taro a ranar Laraba sannan su fito zanga-zanga a washegari domin jaddada bukatun su.
Shugaban ƙungiyar SSANU na yankin Arewa maso Yamma, Sabo Balareba Wudil, ya bayyana cewa sun fito ne domin neman a biya musu albashin watanni biyu da aka dakatar, da kuma aiwatar da yarjejeniyar 2009 da aka kulla tsakaninsu da gwamnatin tarayya.
Ya ce sun daɗe suna jiran biyan bashin da gwamnatin da ta gabata ta ƙi biya, da kuma sabunta yarjejeniyar walwala da ta kamata a sake duba ta tun shekaru 20 da suka wuce.
Haka kuma ya nuna damuwa kan rashin biyan kudaden bashin karin albashi na kashi 25 zuwa 35 cikin ɗari da aka amince da shi tun daga watan Janairu zuwa Disambar 2023.
Karanta: SSANU da NASU sun tsawaita wa’adin yajin aiki
Wudil ya zargi gwamnatin tarayya da yin kunnen uwar shegu ga yarjejeniyoyi da dama da suka sanya hannu a kai, yana mai cewa haƙurinsu na ƙarewa.
Ya ce wannan zanga-zangar gargadi ce ta farko, kuma idan gwamnati ta ƙi ɗaukar mataki, shugabancin ƙasa na ƙungiyar zai yanke shawarar mataki na gaba.
Masu zanga-zangar sun yi tattaki zuwa ginin majalisar jami’ar inda suka mika wasikar korafinsu domin isarwa ga Shugaba Bola Ahmad Tinubu.
Mataimakiyar Shugabar Jami’ar Bayero mai kula da bincike da ci gaba, Farfesa Amina Mustapha, wacce ta karɓi masu zanga-zangar a madadin Shugaban Jami’ar, Farfesa Haruna Musa, ta tabbatar musu da goyon bayan jami’ar.
An gudanar da zanga-zangar cikin lumana, inda mambobin ƙungiyoyin suka riƙe kwalaye suna rera wakokin haɗin kai domin nuna ɓacin ransu kan abin da suka kira raini daga gwamnatin tarayya.
