Tsoffin gwamnonin jihar Kano, Sanata Rabiu Musa Kwankwaso da Dakta Abdullahi Umar Ganduje, sun haɗu a karo na farko tun bayan zaɓen 2023.
Jaridar Solacebase ta rawaito cewa taron ya gudana ne a gidan tsohon gwamnan jihar Bauchi, Ahmad Adamu Mu’azu, da ke Abuja, inda suka je yin ta’aziyya bisa rasuwar mahaifiyarsa.
Wannan ganawar ta jawo hankalin jama’a saboda tsawon lokacin da ake fama da sabani tsakanin shugabannin biyu a fagen siyasa.
Rahotanni sun nuna cewa ganawar ta kasance cikin natsuwa da mutunta juna, inda Kwankwaso da Ganduje suka gaisa tare da miƙa ta’aziyyarsu ga tsohon gwamnan Bauchi.
Ana ganin wannan ganawa na iya zama sabon mataki a dangantakar siyasar Kano, musamman ganin yadda rikicin siyasa ya daɗe yana tsamari a tsakanin bangarorin biyu.
Ganawar ta zo ne kwana guda bayan Ganduje, wanda yanzu shi ne shugaban hukumar kula da filayen jiragen sama ta ƙasa (FAAN), ya gana da gwamnan jihar Kano na yanzu, Abba Kabir Yusuf, a filin jirgin sama na Malam Aminu Kano.
