Shirin bunkasa noma da kiwon dabbobi na Kano (Kano L-PRES) ya halarci Bikin Noma na Kasa na 2025 da ake gudanarwa a Karu, Jihar Nasarawa, daga 24 zuwa 28 ga Nuwamba, 2025.
Sashen ICT/Communications na L-PRES ne ya bayyana haka a wata sanarwa da ta ce taron na hada manyan cibiyoyi na gwamnati, kungiyoyin ci gaba, manoma, masana da ‘yan kasuwa domin nuna sabbin dabaru da karfafa sauyin da ake son samu a fannin noma.
A wajen baje kolin, Shugaban Shirin Kano L-PRES, Dr. Salisu Muhammad Inuwa, ya ce halartar taron muhimmin mataki ne wajen inganta manufar Kano a bangaren kiwon dabbobi da kuma kara hadin gwiwa da kungiyoyin cikin gida da na kasa da kasa.
Ya ce taron ya ba su damar gabatar da nasarorin da suka samu da kuma jawo sabbin jarin da zai bunkasa fannin.
Dr. Inuwa ya bayyana cewa L-PRES ta baje kolin muhimman ayyuka irin su dasa iri ta hanyar artificial insemination, shirin gina cibiyar Livestock Service Centre (LSC), bunkasa kiwo da sarrafa ciyawa, inganta kiwon lafiya na dabbobi da kuma karfafawa a harkar samar da kayayyaki domin kara habaka yawan dabbobi a jihar.
Shi ma jami’in kula da kiwon dabbobi na shirin, Muhammad Abubakar Kabiru, ya ce halartar su a wajen taron na nuna yadda L-PRES ke aiwatar da aikace-aikacen da suka shafi inganta kiwo a matakin al’umma.
Ya ce suna koyar da matasa da mata dabaru kamar gwajin cikin saniya, allura da magunguna, tare da ba su na’urar nika abincin dabbobi, tankokin ajiye madara da babura domin inganta zirga-zirga wajen kiwon dabbobi.
Kano L-PRES ta kara jaddada kudurinta na tallafawa ajandar noma ta jihar da kuma taimakawa wajen cimma burin kasa na bunkasa abinci, tsaron kiwo, tattalin arziki da inganta rayuwar mutanen karkara.
