Ma’aikatan hukumar kula da ingancin abinci da magunguna ta kasa sun yi kira ga gwamnatin tarayya da ta gaggauta inganta albashinsu da yanayin aiki.
Ma’aikatan sun bayyana cewa jindadin su da albashin su bai yi daidai da muhimmiyar rawar da suke takawa wajen kare lafiyar al’umma ba.
A cikin wata wasika mai dauke da kwanan watan 24 ga watan Fabrairu mai dauke da sa hannun shugaban riko na kungiyar ma’aikatan lafiya ta NAFDAC na kasa Jerry Makeri da sakataren kungiyar Aledeh Ahmed, ma’aikatan sun bayyana nasarorin da hukumar ta samu wajen yaki da jabun kayayyakin amma sun koka da yadda ake yin watsi da jin dadi da walwalar su.
A cewarsu, ma’aikatan hukumar ta NAFDAC, tun daga masana kimiyyar dakin gwaje-gwaje zuwa jami’an gudanarwa da ma’aikatan gudanarwa, sune kashin bayan nasarar hukumar.
Kungiyar ta koka da cewa duk da sadaukarwar da suka yi da suka hada da yin aiki a wuraren da ke da hatsarin gaske don murkushe masana’antun da ba su da lasisi da masu sana’ar jabun magunguna, har yanzu ba a kai ga biyan su isassun kudaden da za su kyautata walwalarsu ba.
Kungiyar ta kuma bayyana cewa, ayyukan NAFDAC ya fadada sosai a tsawon shekaru, inda ya shafi nau’o’in kayayyakin masarufi da kuma magance yawaitar ayyukan jabu.
Karin labari: NAFDAC ta lalata kayayyakin jabu da abinci na sama da Naira biliyan 120
Don haka kungiyar ta bukaci gwamnati da ta samar da tsarin albashi na musamman ga ma’aikatan NAFDAC, kwatankwacin yadda sauran hukumomin gwamnati ke gudanar da ayyuka masu mahimmanci.
Har ila yau, sun bukaci a kara yawan ma’aikatan hukumar, inda suka bayyana cewa karfin ma’aikata kusan 2,000 a yanzu bai isa ba da zai iya mamaye kasar nan baki daya.
Sai dai ba a iya samun jami’in kula da hukumar ta NAFDAC kan harkokin yada labarai, Sayo Akintola ba domin jin ta bakinsa har zuwa lokacin hada wannan rahoto.
