Hukumar tsaro ta farin kaya (DSS) ta rubuta takarda zuwa kamfanin X (tsohon Twitter), tana neman a gaggauta cire wani rubutu da ɗan gwagwarmaya kuma ɗan siyasa Omoyele Sowore ya wallafa, wanda suka ce ya zagi Shugaba Bola Tinubu tare da barazana ga tsaron ƙasa.
A ranar 25 ga Agusta, Sowore ya wallafa wani bidiyo na Tinubu yayin ziyarar aiki a Brazil, inda ya soki maganarsa da ta ce cin hanci ya ƙare a Najeriya.
Ya kira Tinubu “barawo” a cikin rubutunsa. DSS ta bayyana wannan rubutu a matsayin ƙarya, cin mutunci da kuma yunƙurin yada ra’ayi mai hatsari.
A cikin wasiƙar da aka sanya hannu a ranar 6 ga Satumba, hukumar ta yi gargadin cewa rubutun na iya tayar da ƙiyayya, ya jawo wasu daga cikin magoya bayan shugaban ƙasa shiga tituna suna zanga-zanga, abin da ke ƙara haifar da tashin hankali.
Karin karatu: Naira dubu 70 bata wadata: Ƙungiyar ƙwadagoNLC da ma’aikata sun nemi a sake duba mafi ƙarancin Albashi
DSS ta ce wannan ya tauye mutuncin shugaban ƙasa da ƙasar gaba ɗaya a idon duniya.
Hukumar ta yi nuni da wasu dokokin Najeriya da Sowore ya karya, ciki har da Criminal Code, Cyber Crimes Act 2025 da kuma dokar hana ta’addanci ta 2022.
Ta ce rubutun ya ƙunshi yaɗa labarin ƙarya, batanci, tayar da ƙiyayyar ƙabila da addini, da kuma “ta’addancin cikin gida.”
DSS ta bukaci X ta goge rubutun cikin sa’o’i 24, inda ta yi barazanar cewa idan hakan bai samu ba, gwamnati za ta ɗauki matakan gaggawa masu tsauri.
A baya, a shekarar 2021, gwamnatin Buhari ta dakatar da ayyukan Twitter a Najeriya bayan an goge wani rubutunsa, matakin da aka ce ya kawo cikas ga martabar ƙasar, sai dai an ɗage wannan takunkumi a watan Janairu 2022.
