A yau talata ne Shugaban kasa Muhammadu Buhari ya kaddamar da kamfanin takin zamani mafi girma a Afrika, kuma na biyu a Duniya mallakin wanda yafi kowa kudi a Afrika Alhaji Aliko Dangote a Ibeju-Lekki dake jihar Legas.
Solacebase ta ruwaito cewa Kamfanin takin wanda aka gina akan dala biliyan biyu da rabi, a farkon fara aikinsa zai ringa samar da Tan milliyan uku na taki a shekara.
Da yake jawabi a wajen taron, Shugaban kasa Muhammadu Buhari ya ce yana da kwarin gwiwar cewa Aliko Dangote zai samu gagarumar a harkar takin zamani kamar yadda ya samu a harkar siminti bangaren takin zamani.
A cewarsa, yadda kamfanin siminti na Dangote ya ta kawo karshen shigo da siminti a Najeriya,da sauran kasashen Afrika, haka yake sa rai wannan kamfani na takin zamani zai kawo gagarumin sauyi a harkar noma a Najeriya dama sauran kasashen Afrika, har ma da duniya baki daya.
Tunda fari a nasa jawabin shugaban Kamfanin Alhaji Aliko Dangote ya bayyana cewa ganin irin wahalar dake sha wajen samar da takin zamani a fadin duniya ya sanya shi samar da wannan kamfani, wanda zai samar da kaso 80 cikin dari na takin da ake bukata a Nigeria da Afrika.
Ya kara da cewa wannan kamfani zai taimaka wajen habaka tattalin arzikin Najeriya dama wasu kasashen Afrika ta hanyar samar da kudaden kasashen ketare kasancewar za’a ringa fita da takin zuwa kasashen ketare.
Alhaji Aliko Dangote ya godewa shugaban kasa Muhammad Buhari bisa irin hadin kai da goyon baya da yake bawa kamfanin, wanda hakan ne ya sanya aka kai ga samun wannan nasara, inda ya godewa sauran ma’aikatun gwamnatin tarayya da suka tallafa wajen samun nasarar wannan aiki.
