Gwamnatin kasar Birtaniya ta ƙi amincewa da bukatar Najeriya na mayar da tsohon mataimakin shugaban majalisar Dattawa Ike Ekweremadu, wanda yake tsare a kasar saboda laifin fataucin sassan jikin ɗan Adam.
A shekarar 2023 ne kotun Birtaniya ta yanke masa hukuncin shekaru tara da wata takwas, bayan ta same shi da laifin hada kai da matarsa Beatrice da kuma likita Obinna Obeta wajen yunkurin amfani da wani matashin Najeriya domin dasa koda ga diyarsu Sonia a wani asibiti mai zaman kansa da ke London.
Wannan hukunci shi ne na farko da aka yanke a karkashin dokar bautar zamani “Modern Slavery Act” ta Birtaniya dangane da fataucin sassan jiki.
A makon da ya gabata ne wata tawagar Najeriya karkashin jagorancin ministan harkokin wajen ƙasa Yusuf Tuggar ta gana da jami’an ma’aikatar shari’ar Birtaniya domin neman a mayar da Ekweremadu ya cigaba da zaman gidan yari a Najeriya.
Sai dai rahoton ya bayyana cewa Birtaniya ta ƙi amincewa da bukatar ne saboda rashin tabbas kan ko Najeriya za ta tabbatar da cewa zai ci gaba da zaman tafiyar da hukuncin bayan dawowarsa.
Wani jami’in ma’aikatar shari’ar Birtaniya ya bayyana cewa ba za su yi magana kan takamaiman fursunoni ba, amma duk wata bukatar mayar da mutum gida ita ce a ikon gwamnatin Birtaniya bayan tantance ko hakan zai dace da bin doka.
Birtaniya ta kara da cewa ba za ta lamunci duk wani nau’i na bautar zamani ba, kuma duk wanda aka samu da laifi zai fuskanci hukunci yadda doka ta tanada.
Beatrice Ekweremadu, wacce aka yankewa hukuncin shekaru hudu da rabi, an sallame ta daga gidan yari bayan kammala rabin hukuncinta, kuma ta dawo Najeriya.
A lokacin yanke hukunci, alkali Jeremy Johnson ya bayyana lamarin a matsayin mummunan kasuwanci da za a iya daukar mutane da jikinsu a matsayin kaya da za a sayar.
A farkon shekarar 2022 ne wanda abin ya shafa, wanda aka bayyana da C a kotu, aka kai shi wani asibitin aikin Ƙoda a London domin dasa Ƙodar da ake bukata a kan kudi fam dubu tamanin.
Amma an gabatar da shi cikin bogi a matsayin dan uwansu wanda ya amince da hakan da kansa.
Asibitin ya ƙi amincewa da aikin a watan Maris 2022 duk da kokarin cin hanci da aka yi, amma ba a sanar da ‘yan sanda ba sai daga baya bayan mutumin ya gudu ya nemi taimako saboda tsoron a kai shi Najeriya domin a yi wani yunkuri.
Likita Obeta, wanda ya samu damar yin aiki. dasa kodar a wannan asibitin a 2021, shi ma yana cigaba da zaman hukuncin shekaru goma.
Bukatar Najeriya ta dawo da Ekweremadu ta gamu da suka daga wasu ‘yan Najeriya, yayin da ofishin jakadancin Najeriya a London bai fitar da wata sanarwa ba har zuwa lokacin kammala rahoton.
