Ministan birnin tarayya Abuja ya fara aiwatar da hukunci a kan kadarori 1,095 da aka soke saboda rashin biyan kuɗin ƙasa na doka da ake karɓa daga masu kadarori a birnin tarayya.
Mai taimaka wa ministan birnin tarayya kan yada bayanai Lere Olayinka ne ya bayyana hakan a ranar Juma’a.
A sanarwar, an bayyana cewa ministan birnin tarayya Nyesom Ezenwo Wike ya amince da fara wannan hukunci a kan kadarorin da ke cikin babban birnin tarayya saboda kin biyan kuɗaɗen da suka haɗa da kuɗin hayar ƙasa da sauran nau’o’in biyan kuɗi.
Kadarorin da abin ya shafa suna cikin unguwannin Asokoro, Maitama, Garki da Wuse a cikin babban birnin tarayya.
Daga cikin jimillar kadarorin, 835 sun shafi rashin biyan kudin hanyar ƙasa yayin da 260 suka shafi saba ka’idoji da suka danganci kuɗin sauya amfani da ƙasa da tarar da ta biyo baya.
Hukumar ta ce ta yi jerin sanarwar gargadi daga watan Mayu zuwa Nuwamba 2025 ta hanyar jaridun ƙasa, shafukan internet da gidajen talabijin, tana sanar da masu kadarori su biya hakkokinsu ko su fuskanci rasa kadarorinsu.
Ta ce duk da wadannan sanarwar, akwai masu kadarorin da ba su biya hakkinsu ba, lamarin da ya saba da tanadin sashe na 28, ƙananan sashe na 5(a) da (b) na dokar amfani da ƙasa da kuma sharuɗɗan mallakar filaye.
Mai taimaka wa ministan ya ce an amince da aiwatar da hukuncin ne bayan karewar wa’adin kwanaki 14 da aka bayar, wanda ya ƙare ranar 25 ga Nuwamba 2025, kuma gwamnatin birnin tarayya za ta aiwatar da hukunci kan kadarorin da suka gaza biyan hakkokinsu na ground rent da na tarar saba ka’ida da kuɗin sauya amfani da ƙasa.
